HELLO SOLAPUR | राष्ट्रवादी काँग्रेस अजितदादा पक्षाला अनेकांनी सोडचिट्टी दिल्यानंतर आता पक्षात नव्याने बडे नेते यायला सुरुवात झालीय. जिल्हाध्यक्ष उमेश पाटील यांनी पक्ष संघटना मजबूत करण्याच्या दृष्टीने आणखी एका नेत्याला पक्षात आणण्याचा प्रयत्न केलाय.
सोलापूर काँग्रेसला सोडचिट्टी दिलेले काँग्रेसचे माजी जिल्हाध्यक्ष धवलसिंह मोहिते पाटील लवकरच राष्ट्रवादी काँग्रेस अजितदादा पक्षात प्रवेश करणार असल्याची सूत्रांची माहिती आहे.
उपमुख्यमंत्री अजित पवार यांच्या उपस्थितीत धवलसिंह मोहिते पाटील यांच्यासोबत पुण्यात बैठक पार पडली आहे. त्यांच्यासोबत त्यांच्या मातोश्री पद्मजादेवी प्रतापसिंह मोहिते पाटील यादेखील बैठकीत उपस्थित होत्या.
काही वेळातच त्यांचा पक्षप्रवेश होणार असल्याची सूत्रांची माहिती आहे. धवलसिंह मोहिते पाटील यांच्यासोबत त्यांच्या मातोश्री पद्मजादेवी माहिते पाटील या देखील पक्ष प्रवेश करणार आहेत.
मागील अनेक दिवसांपासून धवलसिंह मोहिते पाटील हे भाजपच्या संपर्कात होते मात्र अखेर त्यांचा भाजप प्रवेश झाला नाही.
मात्र राष्ट्रवादी अजित पवार गटाचे जिल्हाध्यक्ष उमेश पाटील यांनी धवलसिंह मोहिते पाटील यांना राष्ट्रवादी अजित पवार गटात आणण्यात यश मिळवले आहे. एकीकडे अकलूज नगरपंचायतीची निवडणूक जाहीर झालेली आहे. त्यामुळे अकलूज नगरपंचायतीत राष्ट्रवादी अजित पवार गटाला बडा नेता मिळाला आहे.
धवलसिंह मोहिते पाटील यांनी जर राष्ट्रवादी काँग्रेस पक्षात प्रवेश केला तर त्यांच्यासमोर अकलूज नगर परिषदेचं मोठं आव्हान असणार आहे. त्यामुळे धवलसिंह मोहिते पाटील यांच्यासाठी आपले नेतृत्व सिद्ध करण्यासाठी आणखी एक संधी निर्माण झाली आहे.
