HELLO SOLAPUR | अनगर नगरपंचायतीच्या नगराध्यक्ष पदासाठी राष्ट्रवादी काँग्रेस अजित पवार गटाच्या उमेदवार उज्वला थिटे यांचा उमेदवारी अर्ज अखेर अवैध ठरला आहे. निवडणूक निर्णय अधिकारी सचिन मुळे यांनी याबाबत अधिकृत माहिती दिली.
मात्र दुसरीकडे अपक्ष उमेदवार सरस्वती शिंदे यांचा अर्ज वैध ठरल्याने अद्याप अनगर नगरपंचायत बिनविरोध होणार नाही हे स्पष्ट झाले आहे. मात्र येत्या तीन दिवसात अपक्ष उमेदवार सरस्वती शिंदे यांनी आपला उमेदवारी अर्ज मागे घेतल्यास ही निवडणूक बिनविरोध होऊ शकते.
त्यामुळे नगराध्यक्ष पदाची निवडणूक बिनविरोध झाली नसली तरी आता भाजप विरुद्ध राष्ट्रवादी अजित पवार गट अशा दोन मोठ्या पक्षांमध्ये निवडणूक होणार नाही हे स्पष्ट झाले आहे.
या निवडणुकीत भाजप नेते, माजी आमदार राजन पाटील यांच्या सून प्राजक्ता पाटील आणि राष्ट्रवादी अजित पवार गटाच्या उज्वला थिटे यांच्यात थेट सामना होण्याची शक्यता होती मात्र थिटे यांचा अर्ज बाद झाल्याने निवडणूक जवळपास बिनविरोध झाल्याची चर्चा आहे.
उज्वला थिटे यांच्या अर्जाकडे लक्ष :
उज्वला थिटे यांनी काल पोलीस संरक्षणात उमेदवारी अर्ज दाखल केला होता. त्यांचा अर्ज योग्य ठरेल की नाही याकडे संपूर्ण जिल्ह्याचे लक्ष लागले होते. अखेर त्यांचा अर्ज अवैध ठरला असून राष्ट्रवादी गटासाठी ही धक्कादायक बातमी आहे.
माजी आमदार राजन पाटील यांच्या नेतृत्वाखालील 17 पैकी 16 नगरसेवक पदाचे उमेदवार बिनविरोध निवडून आले आहेत. तर प्रभाग क्रमांक पाच मध्ये नगरसेवक पदासाठी निवडणूक होणार आहे.
मात्र राजन पाटील यांच्या सून प्राजक्ता पाटील यांना आता थेट निवडणुकीच्या मैदानात उतरणे भाग पडले आहे.
