डीसीसी बँकेवरून आमदार राजेंद्र राऊतांची आमदार दिलीप सोपलांवर टीका तर राजन पाटलांची मात्र जाहीर माफी

HELLO SOLAPUR NEWS | सोलापूर येथे आयोजित जिल्हा मध्यवर्ती सहकारी बँक (डीसीसी) सेवक पतसंस्थेच्या कार्यक्रमात भाजप आमदार राजेंद्र राऊत यांनी राजकीय भाषण करताना बार्शीचे ठाकरे गटाचे आमदार दिलीप सोपल यांच्यावर नाव न घेता जोरदार टीका केली. याचवेळी त्यांनी माजी आमदार राजन पाटील यांची जाहीरपणे माफीही मागितली. (Mla rajendra raut on mla dilip sopal at dcc bank worker Programe )

कार्यक्रमात बोलताना आमदार राऊत म्हणाले, “मागच्या काळात डीसीसी बँकेत माझ्याकडून जो त्रास झाला, त्याबद्दल राजन मालक मी तुमची माफी मागतो.” त्यांच्या या वक्तव्याची कार्यक्रमात उपस्थितांकडून विशेष दखल घेण्यात आली.

डीसीसी बँकेच्या कारभाराबाबत बोलताना त्यांनी, “सोलापूर डीसीसी बँकेचा कारभार आधी व्यवस्थित होता. मात्र काही विचित्र प्राण्यांची एन्ट्री झाली आणि कारभार बिघडला,” अशी टीका केली. हे वक्तव्य करताना त्यांनी कोणाचेही नाव घेतले नाही. मात्र त्यांच्या या टीकेचा रोख बार्शीचे ठाकरे गटाचे आमदार दिलीप सोपल यांच्या दिशेने असल्याची राजकीय वर्तुळात चर्चा सुरू झाली आहे.

राऊत यांनी पुढे पालकमंत्री जयकुमार गोरे यांच्याकडे अपेक्षा व्यक्त करत, “आता सोलापूर डीसीसी बँकेत जया भाऊ, तुमच्या मनाप्रमाणे घडेल. डीसीसी बँकेकडे विशेष लक्ष द्या. ही बँक शेतकऱ्यांची लक्ष्मी आहे,” असे आवाहन केले.

बँकेच्या आर्थिक स्थितीचा उल्लेख करताना त्यांनी सांगितले की, सध्या डीसीसी बँकेत साडेसहा हजार कोटी रुपयांपेक्षा अधिक ठेवी असून बँकेचा कारभार आता व्यवस्थित सुरू आहे. तसेच, “कणखर नेता म्हणून जयाभाऊ आपल्याला लाभले आहेत,” असे म्हणत त्यांनी जयकुमार गोरे यांचे कौतुक केले.

राजकीय परिस्थितीवर भाष्य करताना राऊत म्हणाले, “पूर्वी जिल्हा काँग्रेस-राष्ट्रवादीमय होता. लढता लढता नाकेनऊ यायचे. मात्र आता संपूर्ण जिल्हा भाजपमय झाला आहे.”

दूध संघाबाबतही त्यांनी भाष्य करत, “डीसीसी बँकेप्रमाणे दूध संघही व्यवस्थित होऊ शकतो. दूध संघ सुरू झाल्यानंतर हजारो कुटुंबांचे आशीर्वाद मिळतील,” असा विश्वास व्यक्त केला.

यावेळी त्यांनी बँकेतील शिस्तीबाबतही एक वेगळे आवाहन केले. “सर्वांनी बँकेत येताना बँकेचा चहाही पिणार नाही, घरचा डबा घेऊनच बँकेत येऊ, असा निर्धार करूया,” असे ते म्हणाले.

जिल्हा मध्यवर्ती बँक सेवक पतसंस्थेतर्फे आयोजित या कार्यक्रमात आमदार राजेंद्र राऊत यांचा सत्कार करण्यात आला. कार्यक्रमात विविध पदाधिकारी, कर्मचारी आणि कार्यकर्ते मोठ्या संख्येने उपस्थित होते.