HELLO SOLAPUR NEWS | ओबीसी नेते नवनाथ वाघमारे यांनी मराठा समाजातील महिलांबाबत आक्षेपार्ह वक्तव्य केल्याचा आरोप करत संभाजी ब्रिगेड आक्रमक झाली आहे. या प्रकरणी सोलापुरात नवनाथ वाघमारे यांच्याविरोधात ऑनलाइन तक्रार दाखल करण्यात आली आहे. संभाजी ब्रिगेडचे जिल्हाध्यक्ष संभाजीराजे भोसले यांनी ही तक्रार दाखल केलीय.
जालना येथे ओबीसी नेते नवनाथ वाघमारे यांनी मराठा समाजातील महिलांबाबत वादग्रस्त वक्तव्य केल्याचा आरोप संभाजी ब्रिगेडकडून करण्यात आला आहे. या वक्तव्याचा निषेध करत संभाजी ब्रिगेडच्या पदाधिकाऱ्यांनी मंगळवारी रात्री उशिरा सोलापूर पोलीस अधीक्षक कार्यालयात धाव घेतली.
पोलीस अधीक्षक अतुल कुलकर्णी यांची भेट घेत नवनाथ वाघमारे यांच्याविरोधात गुन्हा दाखल करण्याची मागणी करण्यात आली. मात्र, पोलिसांनी तत्काळ गुन्हा दाखल करून घेण्यास असमर्थता दर्शवल्याचा दावा संभाजी ब्रिगेडकडून करण्यात आला.
यानंतर संभाजी ब्रिगेडचे जिल्हाध्यक्ष संभाजीराजे भोसले यांच्या तक्रारीवरून सोलापूर तालुका पोलीस ठाण्याच्या कार्यक्षेत्रात ऑनलाइन तक्रार दाखल करण्यात आली आहे.
नवनाथ वाघमारे यांच्याविरोधात BNS 2023 मधील कलम 196, 352, 353 आणि कलम 79 अन्वये ऑनलाइन तक्रार दाखल करण्यात आल्याची माहिती संभाजी ब्रिगेडकडून देण्यात आली आहे.
दरम्यान, पोलिसांनी अद्याप या तक्रारीवर गुन्हा दाखल केला आहे की नाही, याबाबत अधिकृत माहिती समोर आलेली नाही.
या वेळी संभाजी ब्रिगेडचे पश्चिम महाराष्ट्र अध्यक्ष शाम कदम, जिल्हाध्यक्ष संभाजीराजे भोसले, महिला आघाडीच्या जिल्हाध्यक्ष मीनलताई दास यांच्यासह पदाधिकारी आणि कार्यकर्ते उपस्थित होते.
