HELLO SOLAPUR | सोलापुरातील एमआयडीसी पोलीस ठाण्याच्या हद्दीतील कोंडानगर परिसरात एका तीन वर्षांच्या चिमुकल्याची अतिशय अमानुष आणि धक्कादायक हत्या झाल्याचा प्रकार उघडकीस आला आहे. प्रेयसीच्या तीन वर्षीय मुलाची कथित प्रियकराने गळा दाबून हत्या केल्याचे पोस्टमार्टम अहवालातून स्पष्ट झाले आहे.
मृत चिमुकल्याचे नाव फरहान असून, आरोपीचे नाव मौलाली उर्फ अकबर अब्दुल रज्जाक मुल्ला असे आहे. या प्रकरणी फरहानची आई शैनाज जफर शेख यांनी सोलापूरच्या एमआयडीसी पोलीस ठाण्यात फिर्याद दाखल केली आहे.
नेमकं काय घडलं?
मिळालेल्या माहितीनुसार, 11 डिसेंबर रोजी आरोपी मौलाली उर्फ अकबर हा दारू पिऊन घरी आला होता. त्यावेळी तो झोपलेला असताना त्याच्या शेजारी 3 वर्षांचा फरहान झोपला होता. झोपेत फरहानची विष्ठा आरोपीच्या कपड्याला लागल्याने आरोपीला राग अनावर झाला. याच रागातून आरोपीने चिमुकल्या फरहानला बेदम मारहाण करत गळा दाबून ठार केल्याचा आरोप आहे.
मृत्यू लपवण्याचा प्रयत्न :
घटनेनंतर शैनाज घरी आल्यानंतर आरोपी मौलालीने फरहान खाली पडल्यामुळे बेशुद्ध झाल्याचे खोटे कारण सांगितले. त्यानंतर फरहानला एका खासगी रुग्णालयात दाखल करण्यात आले. मात्र डॉक्टरांनी तात्काळ शासकीय रुग्णालयात घेऊन जाण्याचा सल्ला दिला.
याच दरम्यान आरोपी मौलाली आणि शैनाज दोघेही कर्नाटकातील विजयपूर येथे एसटी स्टँडवर गेले. तेथे आरोपी मौलाली पळून गेला. त्यानंतर शैनाज हिने पहिल्या पतीच्या मदतीने फरहानला विजयपूर येथील शासकीय रुग्णालयात दाखल केले. मात्र डॉक्टरांनी फरहानला मृत घोषित केले.
पोस्टमार्टम अहवालातून धक्कादायक खुलासा :
विजयपूर येथील शासकीय रुग्णालयात करण्यात आलेल्या पोस्टमार्टम अहवालात फरहानचा मृत्यू गळा दाबून झाल्याचे स्पष्ट झाले. यानंतर या प्रकरणाला गंभीर वळण लागले.
प्रथम विजयपूर पोलीस ठाण्यात गुन्हा दाखल करण्यात आला होता. मात्र गुन्हा सोलापुरात घडल्याने पुढील तपासासाठी प्रकरण सोलापूर एमआयडीसी पोलीस ठाण्यात वर्ग करण्यात आले.
आरोपी अटकेत
एमआयडीसी पोलीस ठाण्याचे पोलीस निरीक्षक प्रमोद वाघमारे यांच्या मार्गदर्शनाखाली पोलिसांनी आरोपी मौलाली उर्फ अकबर अब्दुल रज्जाक मुल्ला याला अटक केली आहे. पुढील तपास सुरू असून आरोपीविरोधात गंभीर स्वरूपाचे गुन्हे दाखल करण्यात आले आहेत.
कुटुंबाची पार्श्वभूमी :
शैनाज आणि आरोपी मौलाली हे मूळचे कर्नाटकातील विजयपूर येथील रहिवासी असून गेल्या काही महिन्यांपासून सोलापुरात वास्तव्यास होते. शैनाज ही धुणेभांडी करून उदरनिर्वाह करत होती, तर आरोपी मौलाली हा बिगारी कामगार म्हणून काम करत होता. शैनाजला एकूण चार मुले असून फरहान हा सर्वात लहान मुलगा होता.
ही घटना संपूर्ण सोलापूर शहराला हादरवून टाकणारी असून, एका निष्पाप चिमुकल्याचा झालेला अंत समाजमन सुन्न करणारा आहे.
