HELLO SOLAPUR | मोहोळ तालुक्यातील आढेगाव येथे सायंकाळी झालेल्या वादळी वाऱ्यासह पावसादरम्यान एक दुर्दैवी घटना घडली. विजेचा कडकडाट सुरू असताना वीज पडून एका तरुणाचा जागीच मृत्यू झाला.
मिळालेल्या माहितीनुसार, विजय राजाराम डोंगरे असे मृत तरुणाचे नाव आहे. सायंकाळी अचानक वातावरणात बदल होऊन आढेगाव परिसरात जोरदार वादळी वारे आणि विजांच्या कडकडाटासह पाऊस सुरू झाला.
यावेळी विजय डोंगरे हे आपल्या घराच्या बांधकामाजवळ थांबलेले होते. पावसापासून बचाव करण्यासाठी ते घराकडे जात असतानाच अचानक त्यांच्या अंगावर वीज कोसळली. या घटनेत त्यांचा जागीच मृत्यू झाला.
या घटनेमुळे परिसरात हळहळ व्यक्त केली जात आहे. अचानक घडलेल्या या प्रकारामुळे कुटुंबावर दुःखाचा डोंगर कोसळला आहे.
मृत विजय डोंगरे यांच्या पश्चात पत्नी, एक मुलगा आणि एक मुलगी असा परिवार आहे.
दरम्यान, पावसाळी वातावरणात नागरिकांनी खबरदारी घ्यावी, विजांच्या कडकडाटावेळी मोकळ्या जागेत न थांबण्याचे आवाहन प्रशासनाकडून करण्यात येत आहे.
