HELLO SOLAPUR | मोबाईल आणि सोशल मीडियाच्या वाढत्या वापरामुळे मुलांच्या मानसिक आणि शारीरिक आरोग्यावर होणाऱ्या दुष्परिणामांबाबत चिंता व्यक्त होत आहे. मात्र याबाबत कर्नाटक सरकारने केवळ चर्चा न करता एक मोठा निर्णय घेतला आहे.
कर्नाटकचे मुख्यमंत्री सिद्धरामय्या यांनी १६ वर्षांखालील मुलांसाठी सोशल मीडिया वापरावर बंदी घालण्याचा निर्णय जाहीर केला आहे.
राज्यातील लहान मुलांमध्ये मोबाईलचे व्यसन वाढत असल्याने अभ्यासावर परिणाम होणे, मानसिक ताण वाढणे, झोपेच्या समस्या आणि सामाजिक वर्तनात बदल दिसून येत असल्याचे विविध अहवालांमध्ये समोर आले आहे.
या पार्श्वभूमीवर मुलांचे आरोग्य आणि भविष्य सुरक्षित ठेवण्यासाठी हा निर्णय घेण्यात आल्याचे मुख्यमंत्री सिद्धरामय्या यांनी स्पष्ट केले.
सरकारच्या या प्रस्तावानुसार १६ वर्षांखालील मुलांना फेसबुक, इंस्टाग्राम, एक्स (ट्विटर), स्नॅपचॅट यांसारख्या सोशल मीडिया प्लॅटफॉर्मचा वापर करता येणार नाही.
यासाठी नियमावली तयार करण्याचे काम सुरू असून लवकरच त्याबाबत सविस्तर धोरण जाहीर केले जाणार असल्याची माहितीही देण्यात आली आहे.
तज्ज्ञांच्या मते, लहान वयात जास्त वेळ मोबाईल आणि सोशल मीडियावर घालवल्यामुळे मुलांमध्ये एकाग्रतेचा अभाव, नैराश्य, चिंता आणि आक्रमक वर्तन वाढण्याची शक्यता असते. त्यामुळे पालक आणि शाळांनीही मुलांच्या मोबाईल वापरावर नियंत्रण ठेवण्याची गरज असल्याचे सांगितले जात आहे.
दरम्यान, कर्नाटक सरकारच्या या निर्णयाचे काहींकडून स्वागत होत असताना काही जणांनी याची अंमलबजावणी कशी होणार याबाबत प्रश्नही उपस्थित केले आहेत. तरीही मुलांचे मानसिक आरोग्य आणि शिक्षण लक्षात घेता हा निर्णय महत्त्वाचा ठरू शकतो, असे मत व्यक्त केले जात आहे.
