HELLO SOLAPUR | राष्ट्रवादी काँग्रेस अजित पवार गटाच्या राष्ट्रीय अध्यक्षपदी उपमुख्यमंत्री सुनेत्रा पवार यांची एकमताने निवड करण्यात आली आहे. मुंबईतील वरळी डोम येथे सुरू असलेल्या पक्षाच्या राष्ट्रीय कार्यकारिणीच्या महत्त्वपूर्ण बैठकीत हा निर्णय घेण्यात आला.
सुनेत्रा पवार यांच्या राष्ट्रीय अध्यक्षपदासाठी राष्ट्रीय कार्याध्यक्ष प्रफुल्ल पटेल यांनी अधिकृत ठराव मांडला. त्यानंतर उपस्थित सर्व पदाधिकाऱ्यांनी हात उंच करून या ठरावाला अनुमोदन दिले आणि सुनेत्रा पवार यांची एकमताने निवड करण्यात आली.
विशेष म्हणजे, राष्ट्रवादी काँग्रेसचे नेते आणि उपमुख्यमंत्री अजित पवार यांच्या अपघाती निधनाला अद्याप एक महिना पूर्ण झालेला नाही. या दुःखद घटनेनंतर सुनेत्रा पवार यांनी उपमुख्यमंत्री पदाची जबाबदारी स्वीकारली होती. त्यानंतर आज पक्षाच्या राष्ट्रीय कार्यकारिणीची बैठक घेत, त्यांच्याकडे पक्षाच्या सर्वोच्च नेतृत्वाची जबाबदारीही सोपवण्यात आली आहे.
या बैठकीसाठी देशभरातून राष्ट्रवादी काँग्रेस अजित पवार गटाचे प्रमुख पदाधिकारी, आमदार, खासदार तसेच संघटनात्मक पदाधिकारी मोठ्या संख्येने उपस्थित होते. पक्ष संघटनेला नव्या नेतृत्वाखाली अधिक बळकट करण्याचा निर्धार यावेळी व्यक्त करण्यात आला.
सुनेत्रा पवार यांच्या निवडीमुळे राष्ट्रवादी काँग्रेस अजित पवार गटाला नवीन दिशा आणि स्थैर्य मिळेल, असा विश्वास पक्षाच्या नेत्यांनी व्यक्त केला आहे. आगामी काळात संघटन मजबूत करणे, राज्य आणि राष्ट्रीय पातळीवर पक्षाची भूमिका अधिक प्रभावी करणे, तसेच आगामी निवडणुकांची रणनीती आखणे, या प्रमुख जबाबदाऱ्या त्यांच्या नेतृत्वाखाली पार पाडल्या जाणार आहेत.
