HELLO SOLAPUR | सोलापूर शहर मध्य विधानसभा मतदारसंघातील प्रभाग क्रमांक १३ साठी पहिल्या टप्प्यातील १ कोटी ८० लाख रुपये तसेच २५ -२६ च्या हेडमधून ४ कोटी ८८ लाख रुपये असा एकूण ६ कोटी ६८ लाख रुपयांचा निधी मंजूर झाला आहे. यातील अनेक कामे पूर्ण झाली आहेत तर उर्वरित विकासकामे लवकरच पूर्णत्वास येतील, असा विश्वास शहर मध्य मतदारसंघाचे आमदार देवेंद्र कोठे यांनी व्यक्त केला.
प्रभाग १३ मधील ७० फूट रस्त्यानजीक रस्ता डांबरीकरणाचा शुभारंभ शुक्रवारी आमदार देवेंद्र कोठे यांच्या हस्ते झाला. यावेळी भाजपच्या शहराध्यक्षा रोहिणी तडवळकर यांची प्रमुख उपस्थिती होती.
आमदार देवेंद्र कोठे म्हणाले, प्रभाग क्रमांक १३ हा भाजपचा बालेकिल्ला आहे. येथील नागरिकांनी प्रत्येक निवडणुकीत भारतीय जनता पार्टीला भरभरून मतदान केले आहे. त्याची परतफेड म्हणून प्रभाग क्रमांक १३ साठी सुमारे ७ कोटी रुपयांचा विकासनिधी देण्यात आला आहे.
आमदार देवेंद्र कोठे म्हणाले, पूर्वीचे आमदार एकदा निवडून आले की अनेक महिन्यांनी जणू सुट्टीलाच सोलापूरला येत असत. परंतु माझ्याकडे शहर मध्य विधानसभा मतदारसंघाचा आमदार म्हणून जबाबदारी आल्यानंतर १४ वेळा झालेल्या ‘देव यज्ञ’ या जनता दरबाराच्या माध्यमातून नागरिकांचे प्रश्न सोडविले जात असल्याचा अनुभव शहर मध्य मधील नागरिकांना येत आहे.
तसेच ‘आमदार आपल्या भेटीला’ या उपक्रमातूनही नागरिक माझ्याशी संवाद साधून आपल्या समस्यांचे निराकरण करून घेत आहेत. कार्यकर्त्यांना वाऱ्यावर सोडून देण्याचे पाप काही लोकप्रतिनिधी करतात. परंतु भारतीय जनता पार्टीमध्ये कार्यकर्त्यांच्या पाठीशी भक्कमपणे उभे राहण्याची परंपरा आहे, असेही आमदार देवेंद्र कोठे यांनी सांगितले.
प्रभाग क्रमांक १३ च्या विकासासाठी आणखी निधी लागला तर तो कमी पडू देणार नाही, असेही आमदार देवेंद्र कोठे यांनी आश्वासित केले.
याप्रसंगी आमदार देवेंद्र कोठे यांनी ‘आमदार आपल्या भेटीला’ उपक्रमांतर्गत लक्ष्मी नरसिंह मंदिर परिसर, पोशम्मा मंदिर परिसर, बोल्ली मंगल कार्यालय परिसर, चिप्पा भाजी मंडई, भावनाऋषी हॉस्पिटल परिसरात फिरून नागरिकांशी संवाद साधत निवेदने स्वीकारून त्यांच्या अडचणी जाणून घेतल्या व त्या अडचणींचे निराकरण करण्याचे आश्वासन दिले.
याप्रसंगी भारतीय जनता पार्टीच्या शहर अध्यक्षा रोहिणी तडवळकर, स्थायी समितीचे माजी सभापती राजमहिंद्र कमटम, माजी नगरसेविका विजया वड्डेपल्ली, प्रतिभा मुदगल, सुनिता कामाठी, भीमाशंकर बोळकोटे, अनिल पल्ली, भूपती कमटम, सत्यनारायण गुर्रम, यादगिरी बोम्मा, विजय चिप्पा, मंडल अध्यक्ष अक्षय अंजीखाने, विश्वनाथ प्याटी, सिध्दाराम ख्याडे, सतीश तमशेट्टी, अंजली वलसा, राजकुमार गुजर, प्रशांत पल्ली, एजाज सय्यद, जकप्पा कांबळे, ओंकार होमकर, ओम धुत्तरगावकर, गणेश पवार, अभिषेक चिंता, अंबादास सकिनाल, उदयराज गुल्लापल्ली, श्रीनिवास म्याडम पंतलु, प्रसाद पल्ली, शेखर तमशेट्टी, यशवंत पाथरूट, गंगाधर गुल्लापल्ली आदी उपस्थित होते.
देवस्थानांना निधी कमी पडू देणार नाही : आमदार देवेंद्र कोठे
शहर मध्य विधानसभा मतदारसंघात असलेल्या विविध देवस्थानांवर सोलापूरकर नागरिकांची स्वाभाविकपणे प्रचंड श्रद्धा आहे. या परिसरातील नागरिकांनी देवस्थान आणि परिसराची सुयोग्य निगा राखली आहे. या देवस्थान आणि परिसराच्या विकासासाठी कितीही निधी लागला तर तो कमी पडू दिला जाणार नाही, असे आमदार देवेंद्र कोठे यांनी सांगताच परिसरातील नागरिकांनी टाळ्यांचा कडकडाट करत आनंद व्यक्त केला.
