HELLO SOLAPUR | सोलापुरात अल्पवयीन मुलीवर अत्याचार करून तिला ब्लॅकमेल करत जबरदस्तीने धर्मांतर करून लग्न लावल्याची अत्यंत धक्कादायक घटना उघडकीस आली आहे.
या प्रकरणी विजापूर नाका पोलीस ठाण्यात वकिलासह पाच जणांविरोधात गंभीर गुन्हा दाखल करण्यात आला आहे. या प्रकरणी पोलिसांनी तिघांना अटक केली आहे. तरी दोन आरोपी अद्याप फरार असून त्यांचा शोध सुरू आहे.
पोलिसांनी दिलेल्या माहितीनुसार, मुख्य आरोपी इजराईल शेख हा अल्पवयीन पीडित मुलीचा सतत पाठलाग करत होता. डिसेंबर 2024 मध्ये त्याने मुलीचे फोटो आणि व्हिडिओ मिळवून तिला ब्लॅकमेल करण्यास सुरुवात केली. त्यानंतर तिला मित्र उजेब शेख यांच्या घरी नेऊन तिच्यावर अत्याचार केल्याचा आरोप आहे.
यानंतर डिसेंबर 2025 मध्ये आरोपीने मुलीला लग्नाचे आमिष दाखवत शहर काझी कार्यालयात नेले. तेथे ॲड. अब्दुल्ला खतीब यांनी लग्नासाठी धर्मांतर आवश्यक असल्याचे सांगून काही कागदपत्रांवर तिची सही घेतल्याचा आरोप आहे. त्यानंतर जबरदस्तीने तिचे धर्मांतर करून विवाह लावण्यात आल्याचे तक्रारीत नमूद करण्यात आले आहे.
लग्नानंतर पीडित मुलीला काही महिने कर्नाटकातील कलबुर्गी येथे ठेवण्यात आले. त्या ठिकाणी आरोपीच्या नातेवाईकांकडून तिला मारहाण, उपाशी ठेवणे तसेच मानसिक छळ केल्याचा गंभीर आरोप मुलीने केला आहे.
सदर प्रकरणी पीडितेने दिलेल्या तक्रारीनंतर विजापूर नाका पोलीस ठाण्यात गुन्हा दाखल करण्यात आला. पोलिसांनी तत्काळ कारवाई करत इजराईल शेख, उजेब शेख आणि ॲड. अब्दुल्ला खतीब यांना अटक केली आहे. उर्वरित दोन आरोपी फरार असून त्यांचा शोध सुरू आहे.
या घटनेमुळे शहरात खळबळ उडाली असून पोलिसांकडून पुढील तपास सुरू आहे.
