HELLO SOLAPUR | शिवसेना शिंदे गटाकडून सोलापूर जिल्ह्यात मोठा संघटनात्मक निर्णय घेण्यात आला असून सोलापूर आणि माढा लोकसभा मतदारसंघातील संपूर्ण जिल्हा कार्यकारिणी बरखास्त करण्यात आली आहे. या निर्णयामुळे जिल्ह्यातील राजकीय वर्तुळात मोठी खळबळ उडाली आहे.
एकदा पक्षात पद मिळाले की ते कायम आपल्याकडेच राहते हा शिवसेना नेत्यांचा गैरसमज आता दूर व्हायला सुरुवात झाली. खासदार श्रीकांत शिंदे यांनी मराठवाडा आणि पश्चिम महाराष्ट्रातील धावत्या दौऱ्यात घेतलेल्या आढावा बैठकीचे हे फलित मानले जात आहे.
मिळालेल्या माहितीनुसार, जिल्हा कार्यकारिणीसोबतच महिला आघाडी, युवासेना आणि इतर सर्व प्रकोष्ठ देखील रद्द करण्यात आले आहेत. यामध्ये जिल्हाप्रमुखांपासून ते शाखाप्रमुखांपर्यंतच्या सर्व नियुक्त्या एकाच वेळी रद्द करण्यात आल्या आहेत. त्यामुळे स्थानिक पातळीवरील संपूर्ण संघटनात्मक रचना शून्य करण्यात आली आहे.
हा निर्णय शिवसेना मुख्य नेते तथा राज्याचे उपमुख्यमंत्री एकनाथ शिंदे यांच्या आदेशानंतर घेण्यात आल्याचे स्पष्ट करण्यात आले आहे. पक्ष संघटनेत शिस्त राखण्यासाठी आणि आगामी राजकीय रणनीती लक्षात घेऊन ही कारवाई करण्यात आल्याची चर्चा सुरू आहे.
विशेष म्हणजे, कालच शिवसेनेचे खासदार डॉ. श्रीकांत शिंदे यांनी सोलापूरमध्ये आढावा बैठक घेतली होती. या बैठकीदरम्यान काही पदाधिकाऱ्यांकडून गैरवर्तन झाल्याची माहिती समोर आली होती. या प्रकारामुळे श्रीकांत शिंदे नाराज झाल्याचेही सांगितले जाते. बैठकीत संघटनात्मक कामकाज, स्थानिक पातळीवरील समन्वय आणि पक्षवाढीबाबत गंभीर प्रश्न उपस्थित झाले होते.
याच पार्श्वभूमीवर पक्ष नेतृत्वाने कठोर भूमिका घेत थेट संपूर्ण कार्यकारिणी बरखास्त करण्याचा निर्णय घेतल्याचे मानले जात आहे. आगामी निवडणुकांच्या दृष्टीने नव्याने आणि अधिक सक्षम टीम उभारण्याचा हा प्रयत्न असल्याचे सूत्रांनी सांगितले.
दरम्यान, या निर्णयानंतर जिल्ह्यातील अनेक पदाधिकारी आणि कार्यकर्त्यांमध्ये अस्वस्थता पसरली असून पुढील नियुक्त्यांकडे सर्वांचे लक्ष लागले आहे. नव्या कार्यकारिणीत कोणाला संधी मिळणार, याबाबत राजकीय चर्चांना उधाण आले आहे.
लवकरच नव्या पदाधिकाऱ्यांची घोषणा होण्याची शक्यता असून, पक्ष संघटना अधिक मजबूत करण्यासाठी बदलांची मालिका सुरूच राहण्याची शक्यता वर्तवली जात आहे.
