HELLO SOLAPUR | सोलापूर जिल्हा परिषद आणि पंचायत समिती निवडणुकीसाठी उमेदवारी अर्ज दाखल करण्याचा आज शेवटचा दिवस आहे. त्यामुळे जिल्ह्यातील राजकारण चांगलेच तापले असून अनेक दिग्गज नेते आणि त्यांच्या कुटुंबीयांनी निवडणूक रिंगणात उडी घेतली आहे.
मोहोळ तालुक्यातून राष्ट्रवादी काँग्रेसचे जिल्हाध्यक्ष उमेश पाटील आणि त्यांचे मोठे बंधू संतोष पाटील हे दोन वेगवेगळ्या पक्षांच्या चिन्हावर निवडणूक लढवत आहेत.
संतोष पाटील हे नरखेड गटातून शिवसेना शिंदे गटाकडून ‘धनुष्यबाण’ या चिन्हावर निवडणूक लढवणार आहेत.
तर उमेश पाटील हे कुरुल गटातून राष्ट्रवादी काँग्रेसच्या ‘घड्याळ’ या चिन्हावर निवडणुकीच्या रिंगणात आहेत.
याशिवाय भाजपचे अक्कलकोटचे आमदार सचिन कल्याणशेट्टी यांच्या पत्नीही चपळगाव गटातून भाजपकडून निवडणूक लढवणार आहेत.
सोलापूर जिल्ह्यातील अनेक प्रभावशाली नेते, राजकीय घराणी आणि कुटुंबीय यंदा थेट निवडणूक रिंगणात उतरल्याने ही लढत अधिकच रंगतदार होणार आहे.
त्यामुळे आगामी जिल्हा परिषदेत नक्की कोणता पक्ष आपला झेंडा फडकवणार, याकडे संपूर्ण सोलापूर जिल्ह्याचे लक्ष लागले आहे.
सोलापूर जिल्हा परिषदेसाठी प्रत्येक तालुक्यात सर्वच राजकीय पक्षांनी वेगवेगळ्या पद्धतीची रणनीती आखली आहे. यामध्ये करमाळा तालुक्यात राष्ट्रवादी अजित पवार गट आणि भाजप युतीमध्ये निवडणूक लढत आहे तर शिवसेना शिंदे गट स्वतंत्र निवडणुकीला सामोरे जाणार आहे.
तर सांगोल्यातही भाजप आणि शिवसेना शिंदे गट युतीमध्ये लढण्याची शक्यता आहे. याबाबत माजी आमदार शहाजी बापू पाटील आणि पालकमंत्री जयकुमार गोरे यांनी याला दुजोरा दिला आहे.
तर मोहोळ, अक्कलकोट, पंढरपूर, माळशिरस, बार्शी मध्ये भाजप स्वबळावर लढणार आहे. एकंदरीत जिल्हा परिषद निवडणुकीमध्ये नक्की चित्र कशा पद्धतीचं असणार हे आज दुपारी 3 नंतर स्पष्ट होणार आहे.
