HELLO SOLAPUR | दक्षिण सोलापूर तालुक्यातील वांगी (ता. दक्षिण सोलापूर) येथे दोन जिवलग मित्रांनी कमी वेळाच्या अंतराने आत्महत्या केल्याची हृदय पिळवटून टाकणारी घटना उघडकीस आली आहे. गोरख भोई आणि सुरेश भोई अशी मृत्यू पावलेल्या दोन्ही जिवलग मित्रांची नावे आहेत. या दुर्दैवी घटनेने वांगी गावात शोककळा पसरली आहे.
मिळालेल्या प्राथमिक माहितीनुसार,
वांगी येथील गोरख भोई यांनी प्रथम आपल्या घरी गळफास घेऊन आत्महत्या केल्याची माहिती समोर आली. या घटनेनंतर परिसरात हळहळ व्यक्त होत असतानाच अंत्यविधीचे कार्यक्रम सुरू झाले.
दरम्यान, गोरख भोई यांच्या मृत्यूचे दुःख आणि भावनिक आघात सहन न झाल्यामुळे त्याचा जिवलग मित्र सुरेश भोई यानेही टोकाचे पाऊल उचलत आत्महत्या केल्याची माहिती प्रत्यक्षदर्शींनी दिली आहे. गोरखचा अंत्यविधी सुरू असतानाच सुरेशने शेतात जाऊन झाडाला गळफास घेत आपलं जीवन संपवल्याचा प्रकार उघडकीस आला.
सुरेश भोई यांचे आई-वडील हे शेतात मजूर म्हणून काम करतात. मुलाने घेतलेले हे टोकाचे पाऊल पाहता कुटुंबियांवर दुःखाचा डोंगर कोसळला आहे. एकाच गावातील दोन तरुण मित्रांचे अशा प्रकारे झालेले मृत्यू गावासाठी मोठा धक्का ठरला आहे.
या संपूर्ण घटनेची नोंद दक्षिण सोलापूर येथील मंद्रूप पोलिस ठाण्यात करण्यात आली आहे. पोलिसांकडून पुढील तपास सुरू आहे.
महत्वाची सूचना :
मानसिक तणाव, नैराश्य किंवा भावनिक आघाताचा सामना करत असाल, तर कृपया तात्काळ आपल्या कुटुंबीयांशी, जिवलग मित्रांशी किंवा समुपदेशक/तज्ज्ञांशी संपर्क साधा. आत्महत्या हा कोणत्याही समस्येचा मार्ग नाही. मदत घ्या, बोलून दाखवा – तुमचं जीवन अमूल्य आहे.
