HELLO SOLAPUR | वंदे मातरम गीताला 150 वर्षे पूर्ण झाल्याच्या निमित्ताने सोलापुरात देशभक्तीचा उत्साह शिगेला पोहोचला आहे. या विशेष प्रसंगी दयानंद महाविद्यालय आणि ‘आई प्रतिष्ठान’तर्फे भव्य सामूहिक वंदे मातरम गायन कार्यक्रमाचे आयोजन करण्यात आले होते.
या कार्यक्रमात 1501 विद्यार्थी आणि विद्यार्थिनींनी मिळून तब्बल 1500 फूटात भारताच्या नकाशाची प्रतिकृती साकारली. या कार्यक्रमाला पालकमंत्री जयकुमार गोरे यांनी प्रमुख उपस्थिती दर्शवली.
दयानंद महाविद्यालयाच्या रंगीत वस्त्रांमधून, आकर्षक मांडणी आणि शिस्तबद्ध स्वरूपात विद्यार्थ्यांनी हा भव्य देखावा साकारला. नकाशाच्या मध्यभागी सर्वांनी एकत्र येऊन वंदे मातरम गायले त्यामुळे महाविद्यालय परिसरात देशभक्तीचे वातावरण पाहायला मिळाले.
पालकमंत्री जयकुमार गोरे यांनी सोहळ्याच्या सुरुवातीला वंदे मातरम गीताला विनम्र अभिवादन करून, विद्यार्थ्यांच्या या सर्जनशील उपक्रमाचे कौतुक केले. त्यांनी सांगितले की हा उपक्रम तरुण पिढीत देशप्रेमाची भावना जागृत करणारा आहे.
या प्रसंगी उपस्थित नागरिकांनी विद्यार्थ्यांच्या कलात्मक प्रयत्नांना आणि देशभक्तीच्या भावनेला केलेल्या अभिवादनाचे उत्स्फूर्तपणे स्वागत केले.
‘आई प्रतिष्ठान’चे प्रमुख मोहन डांगरे म्हणाले, “वंदे मातरम हे केवळ गीत नाही, तर भारताच्या स्वातंत्र्यलढ्याचे प्रतीक आहे. 150 वर्षांपूर्वी लिहिलेल्या या गीतातून आजही देशभक्तीचा आणि एकतेचा संदेश प्रतिध्वनीत होतो.”
सोलापुरातील या उपक्रमामुळे शहरात देशप्रेमाचा जयघोष घुमला असून, नागरिकांनी विद्यार्थ्यांच्या या अभिनव कल्पनेचे आणि आयोजनाचे कौतुक केले आहे.
वंदे मातरम या गीताला दीडशे वर्ष पूर्ण होत आहेत. आजही या गीतामुळे देश प्रेमाची भावना प्रतीत होते. दीडशे वर्षानंतरही देशप्रेमाची भावना जोपासावी म्हणून या गीताचा कार्यक्रम राज्यभर आणि देशभर राबवला जात आहे. पंतप्रधान मोदींनी याबाबत मन की बात मध्ये सांगितले होते त्याप्रमाणे आई प्रतिष्ठान आणि दयानंद शिक्षण संस्थेच्या वतीने हा सुंदर कार्यक्रम पार पडला.
– जयकुमार गोरे,
पालकमंत्री, सोलापूर
