HELLO SOLAPUR | मागासवर्गीय समाजात जन्म, डोक्यावर तेलगू मातृभाषेचा संस्कार आणि कुटुंबाची दारिद्र्यात पिचलेली स्थिती अशा प्रतिकूल परिस्थितीत सोलापूरच्या झोपडपट्टीतील ज्योती वाघमारे यांनी केवळ शिक्षणाची वाट धरली नाही, तर आज त्या थेट महाराष्ट्राच्या राजकारणात शिवसेनेच्या (एकनाथ शिंदे गट) ‘स्टार प्रचारक’ म्हणून विमान आणि हेलिकॉप्टरने राज्याचा दौरा करत आहेत.
कधीकाळी अनवाणी पायांनी शाळेत जाणाऱ्या या कन्येचा हा प्रवास खऱ्या अर्थाने ‘अंगार’ आहे. शिक्षणाचे तेज आणि सामाजिक लढ्याचे बीजअत्यंत गरीब आणि अशिक्षित आई-वडिलांच्या पोटी जन्मलेल्या डॉ. ज्योती वाघमारे यांनी बारावी बोर्डात मागासवर्गीय विद्यार्थ्यांमध्ये सर्वप्रथम येऊन आपले शैक्षणिक तेज सिद्ध केले.
त्यांची मातृभाषा तेलगू असली तरी, मराठीतून व्याख्याने, सूत्रसंचालन आणि वक्तृत्व स्पर्धेत त्यांनी अनेक बक्षिसे जिंकली. याच काळात, फुले-शाहू-आंबेडकर चळवळीची धग त्यांच्या रक्तात भिनली.
त्यांनी आंबेडकरी चळवळीचा ‘धगधगता अंगार’ म्हणून ओळख निर्माण केली.झोपडपट्टीवासीयांच्या, महिलांच्या, दलितांच्या आणि शोषित-पीडितांच्या समस्यांसाठी त्यांनी केवळ लढा दिला नाही, तर त्यांच्यासाठी सक्रिय चळवळ उभी केली.
विद्रोही साहित्याच्या विचारांना सामान्य जनतेपर्यंत पोहोचवण्यासाठी त्यांनी विद्रोही साहित्य संमेलनाचे यशस्वी आयोजन केले.शिवसेनेत प्रवेश आणि ‘ताई’ म्हणून ओळखजनतेसाठी काम करत असतानाच, त्यांनी राजकारणात सक्रिय होण्याचा निर्णय घेतला.
एकनाथ शिंदे साहेबांच्या नेतृत्वाखाली त्यांनी शिवसेनेत (शिंदे गट) प्रवेश केला आणि त्यांच्या कार्यामुळे त्यांना लगेचच ‘प्रदेश प्रवक्ता’ पदावर नियुक्त करण्यात आले. त्यांच्या कामातील आक्रमकपणा आणि निष्ठेमुळे त्या मुख्यमंत्री एकनाथ शिंदे यांच्या ‘लाडक्या बहीण’ म्हणून ओळखल्या जाऊ लागल्या.
शिवसेनेचा विचार आणि मुख्यमंत्री शिंदे साहेबांचे कार्य त्यांनी संपूर्ण महाराष्ट्रात प्रभावीपणे आणि आक्रमकतेने मांडले. त्यांच्या याच वक्तृत्वशैलीमुळे, लोकसभा, विधानसभा आणि आता स्थानिक स्वराज्य संस्थांच्या निवडणुकांसाठी त्यांची पक्षाच्या ‘स्टार प्रचारक’ म्हणून नियुक्ती झाली आहे.
अनवाणी चालणारी मुलगी ते हेलिकॉप्टरने प्रचार करणारी नेत्याएकेकाळी पायात घालायला चप्पलही नसल्यामुळे सोलापूरच्या रस्त्यांवर अनवाणी चालत जाणाऱ्या त्याच ज्योती वाघमारे आज राज्याच्या कानाकोपऱ्यात पक्षाचा संदेश पोहोचवण्यासाठी हेलिकॉप्टर आणि विमानाने प्रवास करत आहेत.
हा केवळ एका व्यक्तीचा नाही, तर दृढ इच्छाशक्ती, शिक्षण आणि संघर्षातून उभा राहिलेल्या एका सामाजिक क्रांतीचा विजय आहे. डॉ. ज्योती वाघमारे यांचा हा प्रवास महाराष्ट्रातील प्रत्येक गरजू तरुणाईसाठी एक स्फूर्ती देणारी कहाणी आहे.
