HELLO SOLAPUR | मोहिते पाटील कुटुंबाला मुख्यमंत्री देवेंद्र फडणवीस यांनी दुसरा धक्का दिला आहे. मोहिते पाटील कुटुंबाशी संबंधित असलेल्या सुमित्रा पतसंस्थेतील गैरव्यवहाराची चौकशी करण्याचे आदेश मुख्यमंत्री देवेंद्र फडणवीस यांनी दिले आहेत.
माळशिरस तालुक्यातील नातेपुते मंडलाचे उपाध्यक्ष भाजप पदाधिकारी हरी पालवे यांच्या तक्रारीवरून मुख्यमंत्री देवेंद्र फडणवीस यांनी हे चौकशीचे आदेश दिले आहेत. बाळदादा उर्फ जयसिंह मोहिते पाटील हे सुमित्रा ग्रामीण बिगरशेती सहकारी पतसंस्थेचे अध्यक्ष होते. त्यामुळे सुमित्रा पतसंस्थेची चौकशी करण्याचे आदेश मुख्यमंत्र्यांकडून सहकार विभागाला देण्यात आले आहेत.
सुमित्रा पतसंस्थेत बोगस कर्ज प्रकरणे दाखवून सामान्य शेतकऱ्यांकडून वसुली केल्याचा गंभीर आरोप आहे. तसेच बेकायदा वसुली करून शेकडो कोटी रुपये अध्यक्ष आणि संचालकांनी हडपल्याचाही आरोप करण्यात आला आहे.
तक्रारीनुसार, मागील दहा वर्षांपासून अधिकाऱ्यांशी संगणमत करून एक हजारांपेक्षा जास्त प्रकरणांमध्ये बोगस वसुली प्रकरणे दाखल करण्यात आली असून, सुमारे पन्नास ते साठ कोटींचा बेकायदा व्यवहार झाल्याचा आरोप भाजप पदाधिकारी हरी पालवे यांनी केला आहे.
या पार्श्वभूमीवर वरील प्रकरणाची उच्चस्तरीय चौकशी करून तत्कालीन अध्यक्ष बाळदादा उर्फ जयसिंह मोहिते पाटील यांच्यावर कारवाई करण्याची मागणी करण्यात आली आहे.
मुख्यमंत्र्यांनी याबाबत तात्काळ चौकशीचे आदेश सहकार विभागाला दिले असून, माळशिरस तालुक्यातील सुमित्रा पतसंस्थेची पुन्हा एकदा चौकशी होण्याची शक्यता वाढली आहे. या चौकशीमुळे मोहिते पाटील कुटुंबाच्या अडचणीत वाढ होण्याची शक्यता आहे.
दोनच दिवसांपूर्वी भाजपने राम सातपुते यांच्यावर स्थानिक स्वराज्य संस्थेच्या वतीने प्रमुख म्हणून जबाबदारी दिली आहे. हा देखील मोहिते पाटलांसाठी मोठा धक्का मानला जात आहे. त्यानंतर आता थेट मोहिते पाटलांची संबंधित असलेल्या सुमित्रा पतसंस्थेचे चौकशी करण्याचे आदेश देण्यात आले आहेत.
