HELLO SOLAPUR | सोलापुरात पालकमंत्री जयकुमार गोरे यांनी ऑपरेशन लोटस राबवल्याचं पुन्हा एकदा पाहायला मिळालं. एकेकाळी बलाढ्य असलेल्या पक्षातील निष्ठावंत घराणे असलेल्या आणखी एका ‘मराठा सरदारा’चा भारतीय जनता पक्षात प्रवेश झाल्याची खात्रीलायक माहिती समोर येत आहे.
या पक्षप्रवेशामुळे बलाढ्य पक्षाची अवस्था दयनीय झाली आहे. काही दिवसांपूर्वी या पक्षाचे विद्यमान कार्याध्यक्ष भाजपात सामील झाले होते. त्यानंतर आता उच्चशिक्षित असलेला आणखी एक चेहरा भाजपत गेल्याची माहिती आहे.
नुकताच भारतीय जनता पक्षात प्रवेश केलेल्या काँग्रेसच्या माजी आमदार दिलीप माने यांच्या निवासस्थानी हा पक्षप्रवेश सोहळा पार पडल्याची माहिती आहे. मात्र काही कारणास्तव या पक्षप्रवेशाची अधिकृत घोषणा उद्या जाहीर करण्यात येणार आहे.
सोलापूर महापालिका निवडणुकीच्या पार्श्वभूमीवर या बलाढ्य पक्षाला आणखी एक मोठा धक्का बसण्याची शक्यता आहे. पालकमंत्री जयकुमार गोरे यांनी सोलापूर जिल्ह्यासह शहरात देखील ऑपरेशन लोटस जोरदार राबवल्याचं पाहायला मिळत आहे.
भाजपात प्रवेश केलेले हे उच्चशिक्षित माजी नगरसेवक कालपर्यंत याच पक्षाच्या शहरप्रमुखा सोबत घरोघरी प्रचार करताना पाहायला मिळाले होते. मात्र अचानक आज त्यांच्या पक्ष प्रवेश झाल्याने राजकीय वर्तुळात भुवया उंचावल्या आहेत.
