HELLO SOLAPUR | सोलापुरातून शिवसेना ठाकरे गटासाठी मोठी आणि धक्कादायक बातमी समोर येत आहे.
शिवसेना ठाकरे गटाचे सोलापूर जिल्हाप्रमुख संतोष पाटील यांनी आपल्या पदाचा राजीनामा दिला आहे. पक्षातील अंतर्गत वाद, संघटनात्मक गोंधळ आणि वरिष्ठांच्या कारभाराबाबत नाराजी व्यक्त करत संतोष पाटील यांनी हा निर्णय घेतल्याची माहिती आहे.
आपल्या राजीनामा पत्रात संतोष पाटील यांनी थेट जिल्हाप्रमुख अजय दासरी यांच्या मनमानी कारभारावर गंभीर आरोप केले आहेत. पक्षात लोकशाही पद्धतीने निर्णय घेतले जात नसल्याने, कार्यकर्ते आणि पदाधिकाऱ्यांमध्ये प्रचंड असंतोष असल्याचेही त्यांनी पत्रात नमूद केले आहे.
महत्त्वाची बाब म्हणजे, आजच दुपारी शिवसेना ठाकरे गटाच्या तब्बल 100 पदाधिकाऱ्यांनी एकाचवेळी राजीनामे दिले होते. या घटनेनंतर काही तासांतच थेट जिल्हाप्रमुखांनी राजीनामा दिल्याने पक्षातील अस्थिरता चव्हाट्यावर आली आहे.
या संपूर्ण प्रकरणामुळे सोलापूर जिल्ह्यातील शिवसेना ठाकरे गटात मोठी फूट आणि गोंधळाचे वातावरण निर्माण झाले आहे. अजय दासरी यांच्या नेतृत्वावर आता खुलेपणाने आरोप-प्रत्यारोप सुरू असून, अनेक कार्यकर्ते आणि पदाधिकारी नाराजी व्यक्त करत असल्याचे चित्र आहे.
ऐन स्थानिक स्वराज्य संस्था निवडणुकांच्या पार्श्वभूमीवर घडलेल्या या घडामोडींमुळे शिवसेना ठाकरे गटासाठी ही परिस्थिती राजकीयदृष्ट्या अडचणीची मानली जात आहे.
दरम्यान, या संपूर्ण प्रकरणाची पक्षप्रमुख उद्धव ठाकरे दखल घेणार का, तसेच संघटनेत बदल किंवा कारवाई होणार का, याकडे आता सोलापूरसह राज्याचे लक्ष लागले आहे.
सोलापूरमधील ठाकरे गटातील या घडामोडी पुढे कोणते वळण घेतात, याकडे सर्वांचे लक्ष असणार आहे.
