HELLO SOLAPUR | सोलापूर जिल्ह्यातील बार्शी तालुक्यात रेल्वे आणि ट्रॅक्टरचा अपघात झाला आहे. बार्शी तालुक्यातील खांडवी–शेंद्री रेल्वे स्टेशन परिसरात हा अपघात झाला आहे.
आज सायंकाळी 7 वाजण्याच्या सुमारास हा अपघात झाला आहे.
पुण्याहून येणाऱ्या हडपसर–हैद्राबाद एक्सप्रेस रेल्वे आणि एका ट्रॅक्टरचा किरकोळ अपघात झाल्याची माहिती प्रशासनाकडून देण्यात आली आहे.
अपघात कसा घडला?
प्राथमिक माहितीनुसार,रेल्वे क्रॉसिंगवर असलेला फाटक वेळेवर न लावल्यामुळे हा अपघात झाल्याचे सांगितले जात आहे.
ट्रॅक्टर चालक रेल्वे लाईन ओलांडत असताना एक्सप्रेस ट्रेन वेगाने आल्यानं ट्रॅक्टरचा पुढील भाग रेल्वेला धडकला. मात्र या अपघातात कोणतीही जीवितहानी झाली नसल्याची माहिती प्रशासनाने दिलीय.
सुदैवाने या अपघातामध्ये कोणतीही जीवितहानी झालेली नाही, अशी अधिकृत माहिती रेल्वे प्रशासनाकडून देण्यात आली आहे. ट्रेनमधील प्रवासी तसेच ट्रॅक्टर चालक सुरक्षित असल्याचे स्पष्ट करण्यात आले.
दरम्यान या अपघातात जोरदार धडकेमुळे ट्रॅक्टरच्या पुढील भागाचे मोठ्या प्रमाणात नुकसान झाले आहे. अपघातानंतर ट्रॅक्टर बाजूला हटवून रेल्वे वाहतूक काही वेळात सुरळीत करण्यात आली.
या अपघाताचा पंचनामा सुरू असून फाटक का लावण्यात आले नाही, याबाबत चौकशी रेल्वे विभागाकडून केली जात आहे.
स्थानिक पोलीस व रेल्वे सुरक्षा दलानेही घटनास्थळी भेट देऊन परिस्थितीचा आढावा घेतला आहे.
धडक किरकोळ असल्याने रेल्वे मार्गाला कोणतीही गंभीर हानी झाली नाही. हडपसर–हैद्राबाद एक्सप्रेस काही मिनिटांच्या विलंबानंतर पुढील प्रवासासाठी रवाना झाल्याची माहिती आहे.
