HELLO SOLAPUR | पंढरपूरमधील ॲसिड हल्ला प्रकरणाने धक्कादायक वळण घेतले असून सुरुवातीला अज्ञातांकडून हल्ला झाल्याची चर्चा असताना आता या प्रकरणामागचे वास्तव समोर आले आहे. संबंधित तरुणीने स्वतःच अंगावर ॲसिड ओतून घेतल्याची कबुली दिल्याने संपूर्ण घटनेने वेगळीच दिशा घेतली आहे.
पंढरपूर शहरातील मध्यवस्तीत राहणाऱ्या वैष्णवी सुदाम भागवत या तरुणीवर काही दिवसांपूर्वी ॲसिड हल्ला झाल्याची घटना समोर आली होती. या घटनेमुळे शहरात एकच खळबळ उडाली होती. सुरुवातीला हा हल्ला अज्ञात व्यक्तींनी केल्याची शक्यता व्यक्त केली जात होती. मात्र आता स्वतः वैष्णवी भागवत हिने माध्यमांशी बोलताना या प्रकरणामागील सत्य उघड केले आहे.
वैष्णवीने दिलेल्या माहितीनुसार, घरातील सततच्या कौटुंबिक वादांमुळे ती मानसिक तणावाखाली होती. विशेषतः आजीकडून वारंवार “तुला रोग झाला आहे, त्यामुळे तू सतत आजारी पडतेस” अशा प्रकारच्या बोलण्यामुळे ती अधिकच नैराश्यात गेली होती. या मानसिक तणावातूनच जीवन संपवण्याच्या उद्देशाने तिने स्वतःवर ॲसिड ओतून घेतल्याचे तिने सांगितले.
या धक्कादायक खुलाशामुळे पोलिस तपासाची दिशा बदलण्याची शक्यता आहे. दरम्यान, वैष्णवीवर सध्या उपचार सुरू असून तिची प्रकृती स्थिर असल्याची माहिती मिळत आहे. या घटनेमुळे मानसिक आरोग्य, कौटुंबिक वातावरण आणि संवाद यांचे महत्त्व पुन्हा एकदा अधोरेखित झाले आहे.
पोलिसांकडून या प्रकरणाचा पुढील तपास सुरू असून, सर्व बाजूंनी चौकशी केली जात आहे. तसेच, अशा घटना टाळण्यासाठी समाजात जागरूकता वाढवण्याची गरज व्यक्त केली जात आहे.
