HELLO SOLAPUR | सोलापूर महानगरपालिका निवडणुकांच्या पार्श्वभूमीवर राजकीय हालचालींना वेग आला असून, पालकमंत्री जयकुमार गोरे यांनी आज सिद्धेश्वर देवस्थानचे अध्यक्ष धर्मराज काडदी यांची भेट घेतली. या भेटीमुळे सोलापूरच्या राजकीय वर्तुळात चर्चेला उधाण आले आहे.
सोलापूर शहरात लिंगायत समाजाचे मोठे प्रस्थ म्हणून धर्मराज काडदी यांची ओळख आहे. सामाजिक, धार्मिक आणि सार्वजनिक जीवनात त्यांचा मोठा प्रभाव असून, त्यामुळे ही भेट राजकीय दृष्टिकोनातून अत्यंत महत्त्वाची मानली जात आहे.
या भेटीदरम्यान सोलापूर महानगरपालिका निवडणुकांबाबत सविस्तर चर्चा झाल्याची माहिती सूत्रांकडून मिळत आहे. यावेळी धर्मराज काडदी यांनी महापालिका निवडणुकांमध्ये सोबत राहण्याचा शब्द पालकमंत्री जयकुमार गोरेंना दिला, अशीही चर्चा राजकीय वर्तुळात सुरू आहे.
विशेष म्हणजे, यंदा सोलापूर महापालिकेची निवडणूक आणि ग्रामदैवत श्री सिद्धरामेश्वर महाराजांची यात्रा एकाच कालावधीत येत असल्याने, या भेटीला अधिक महत्त्व प्राप्त झाले आहे. धार्मिक आणि सामाजिक पार्श्वभूमी लक्षात घेता ही भेट आगामी निवडणुकांमध्ये निर्णायक ठरू शकते.
दरम्यान, सोलापूर महानगरपालिकेवर कमळ फुलवण्यासाठी भाजपने पूर्ण ताकद पणाला लावली आहे. वरिष्ठ नेते, मंत्री आणि संघटनात्मक पातळीवरून जोरदार तयारी सुरू असून, विविध समाजघटकांशी संवाद साधण्यावर भर दिला जात आहे.
पालकमंत्री जयकुमार गोरे आणि धर्मराज काडदी यांची ही भेट महापालिका निवडणुकांच्या दृष्टीने किती निर्णायक ठरणार, याकडे आता सर्वांचे लक्ष लागले आहे.
