HELLO SOLAPUR | कालच जिल्हा परिषद निवडणूक जाहीर झाली असतानाच भारतीय जनता पक्षाला मोठा धक्का बसलाय. भाजपचे दोन बडे नेते राष्ट्रवादी काँग्रेस अजित पवार गटाच्या गळाला लागले आहेत.
सोलापूर जिल्हा परिषदेचे उपाध्यक्ष शिवानंद पाटील आणि जिल्हा परिषदेच्या अर्थ विभागाचे सभापती विजयराज डोंगरे हे राष्ट्रवादी काँग्रेस अजित पवार गटामध्ये पक्षप्रवेश करणार आहेत.
एकीकडे भाजप सोलापूर जिल्ह्यात जिल्हा परिषद निवडणुका स्वबळावर लढण्याच्या तयारीत असतानाच दुसरीकडे भाजपाला दोन जिल्हा परिषद सदस्यांनी जय श्रीराम केला आहे.
उपमुख्यमंत्री अजित पवार आज सोलापूर जिल्ह्याच्या दौऱ्यावर येणार होते मात्र अचानक त्यांचा दौरा रद्द झाला. आज दोन्ही नेत्यांचा पक्षप्रवेशाचा कार्यक्रम पार पडणार होता. मात्र जिल्हा परिषद निवडणुकीची आचारसंहिता लागू झाल्याने पक्षप्रवेशाच्या कार्यक्रमाचा खर्च निवडणूक खर्चात ग्राह्य धरला जाण्याची शक्यता असल्याने हा दौरा रद्द झाला असल्याचे बोलले जात आहे.
असं असलं तरी दोन्ही नेत्यांना उपमुख्यमंत्री अजित पवारांनी बारामती मध्ये बोलावणे धाडले आहे त्यामुळे बारामतीत त्यांचा पक्षप्रवेश होण्याची शक्यता आहे.
मोहोळ तालुक्यात राष्ट्रवादीचे माजी आमदार राजन पाटील यांनी भाजप प्रवेश केल्यामुळे भाजपचे जिल्हा परिषद सदस्य आणि सभापती विजयराज डोंगरे यांनी राष्ट्रवादी काँग्रेस अजित पवार गटाची वाट धरली आहे. मोहोळ तालुक्यात राजन पाटील विरुद्ध मनोहर डोंगरे असा राजकीय संघर्ष गेल्या अनेक वर्षांपासून आहे.
त्यातच राजन पाटील भाजपत आल्याने डोंगरे पिता-पुत्रांनी पुन्हा घर वापसी करण्याचा निर्णय घेतला असल्याचे बोलले जात आहे.
तर तिकडे अक्कलकोटचे भाजपचे माजी आमदार सिद्रामप्पा पाटील यांचे पुत्र आणि जिल्हा परिषदेचे उपाध्यक्ष शिवानंद पाटील यांनी देखील भाजप सोडण्याचा निर्णय घेतला आहे. पक्ष सोडण्याचे कारण समोर आले नसले तरी आमदार सचिन कल्याणशेट्टी यांच्यासोबत वैचारिक खटके उडत असल्याने हा निर्णय घेतला असल्याचे बोलले जात आहे.
दरम्यान जिल्हा परिषदेची निवडणूक जाहीर होताच भाजपला दोन मोठे धक्के बसल्याने आगामी काळात सोलापूर जिल्ह्यात भाजपला जिल्हा परिषदेत सत्ता आणण्यासाठी मोठी कसरत करावी लागणार हे नक्की.
तर पुण्याप्रमाणे सोलापुरात राष्ट्रवादी काँग्रेस अजित पवार गट आणि शरद पवार गट एकत्र आल्यास भाजपाला स्वबळावर जिल्हा परिषद ताब्यात घेण्याचे स्वप्न भंगण्याची शक्यता नाकारता येत नाही.
