HELLO SOLAPUR | शहरातील मध्यवस्तीत घडलेल्या एका धक्कादायक घटनेमुळे संपूर्ण पंढरपूर हादरले आहे. एका तरुणीवर अज्ञात तरुणांकडून ॲसिड हल्ला करण्यात आला असून, या घटनेने परिसरात भीती आणि संतापाचे वातावरण निर्माण झाले आहे.
मिळालेल्या माहितीनुसार, वैष्णवी सुदाम भागवत असे ॲसिड हल्ल्यात जखमी झालेल्या तरुणीचे नाव आहे. ही घटना शहरातील गर्दीच्या मध्यवस्तीत घडली. अचानक झालेल्या या हल्ल्यामुळे नागरिकांमध्ये एकच खळबळ उडाली.
हल्लेखोरांनी तरुणीवर ॲसिड फेकताच तेथून तात्काळ पळ काढला. घटनेनंतर स्थानिक नागरिकांनी तत्परता दाखवत जखमी तरुणीला तातडीने जवळच्या खाजगी रुग्णालयात दाखल केले. सध्या तिच्यावर उपचार सुरू असून, तिची प्रकृती गंभीर असल्याची प्राथमिक माहिती समोर येत आहे.
या घटनेची माहिती मिळताच पोलिसांनी घटनास्थळी धाव घेतली असून, हल्लेखोरांचा शोध सुरू केला आहे. सीसीटीव्ही फुटेजच्या आधारे आरोपींचा माग काढण्याचे प्रयत्न सुरू आहेत. हल्ल्यामागील नेमके कारण अद्याप स्पष्ट झालेले नाही.
दरम्यान, शहराच्या मध्यभागी घडलेल्या या प्रकारामुळे कायदा आणि सुव्यवस्थेचा प्रश्न पुन्हा ऐरणीवर आला आहे. नागरिकांमध्ये भीतीचे वातावरण पसरले असून, आरोपींना तात्काळ अटक करून कठोर कारवाई करण्याची मागणी होत आहे.
या अमानुष घटनेमुळे पंढरपूर शहरात संतापाची लाट उसळली असून, महिलांच्या सुरक्षेचा मुद्दा पुन्हा एकदा चर्चेत आला आहे.
