HELLO SOLAPUR | सोलापुरातील माजी आमदारांच्या भाजप प्रवेशाची तारीख अखेर निश्चित झाली आहे. मागील आठ दिवसापासून राष्ट्रवादी काँग्रेस तसेच काँग्रेसच्या माजी आमदारांच्या भाजप प्रवेशावर मोठी चर्चा सुरू होती. मात्र या माजी आमदारांच्या प्रवेशाचा मुहूर्त ठरलेला नव्हता. ( Solapur Ex Mla Bjp Joins on this date)
मात्र आता चार पैकी तीन माजी आमदारांच्या प्रवेशाची तारीख निश्चित झाली आहे. येत्या 29 ऑक्टोबरला तीन माजी आमदारांचा भाजप प्रवेश होणार आहे. भाजप प्रदेशाध्यक्ष रवींद्र चव्हाण यांच्या उपस्थितीत मुंबई येथे हा पक्षप्रवेश सोहळा पार पडणार आहे.
यामध्ये मोहोळचे माजी आमदार राजन पाटील, माजी आमदार यशवंत माने तसेच माढ्याचे माजी आमदार बबनदादा शिंदे यांचे पुत्र रणजितसिंह शिंदे यांचा पक्ष प्रवेश होणार आहे.
मात्र काँग्रेसचे माजी आमदार दिलीप माने यांचा पक्षप्रवेश तूरथास रखडलेला असल्याचे पाहायला मिळते. भाजपा पदाधिकाऱ्यांकडून काँग्रेसचे माजी आमदार दिलीप माने यांच्या पक्षप्रवेशाला कडाडून विरोध करण्यात आला होता.
भाजप आमदार सुभाष देशमुख यांच्या समर्थकांनी भाजप कार्यालयाबाहेरच धरणे आंदोलन केले होते. मात्र पक्ष नेतृत्वाकडून स्थानिक नेत्यांशी चर्चा करुन अखेर चारही माजी आमदारांचा पक्षप्रवेश निश्चित करण्यात आला आहे.
29 ऑक्टोबर रोजी माजी आमदार दिलीप माने यांचा पक्ष प्रवेश होणार नसल्याची खात्रीलायक सूत्रांची माहिती आहे. मात्र असं असलं तरी दिलीप माने यांचा पक्षप्रवेश निश्चित आहे.
भाजपाच्या नेत्यांकडून नाराज असलेल्या स्थानिक पदाधिकारी आणि कार्यकर्त्यांशी चर्चा करून दिलीप माने यांचा पक्ष प्रवेश निश्चित झाला आहे.
