HELLO SOLAPUR | राष्ट्रवादी शरद पवार गटाचे माढा लोकसभा मतदारसंघाचे खासदार धैर्यशील मोहिते पाटील यांनी काल नवी दिल्लीत केंद्रीय सहकारमंत्री अमित शाह यांची भेट घेतली.
या भेटीत सहकार क्षेत्रातील दुग्ध व्यवसायाशी संबंधित विविध समस्या व अडचणींवर सविस्तर चर्चा करण्यात आली.
दुग्ध उत्पादक शेतकरी, सहकारी दूध संघ तसेच सहकार क्षेत्राची आर्थिक मजबुती यासाठी आवश्यक असलेल्या उपाययोजनांबाबत खासदार मोहिते पाटील यांनी आपली भूमिका मांडली.
यामध्ये दूध दर, उत्पादन खर्च, प्रक्रिया व विपणनाशी संबंधित प्रश्न, तसेच सहकारी संस्थांना बळकटी देण्यावर भर देण्यात आला.
यावर केंद्रीय सहकारमंत्री अमित शाह यांनी सकारात्मक प्रतिसाद देत सर्वतोपरी सहकार्य करण्याचे आश्वासन दिले आहे.
या चर्चेमुळे आगामी काळात दुग्ध उत्पादक शेतकऱ्यांना दिलासा मिळेल, अशी अपेक्षा व्यक्त केली जात आहे.
नुकत्याच पार पडलेल्या नगरपालिका निवडणुकीत भाजप विरुद्ध मोहिते पाटील असा संघर्ष पाहायला मिळाला. यामध्ये माजी आमदार राम सातपुते यांनी मोहिते पाटील कुटुंबावर जोरदार प्रहार केल्याचे पाहायला मिळाले होते.
त्यानंतर खासदार धैर्यशील मोहिते पाटलांनी केंद्रीय गृहमंत्री तथा सहकार मंत्री अमित शहा यांची भेट घेतल्याने राजकीय चर्चेला उधाण आले आहे.
त्याचबरोबर मोहिते पाटील समर्थकांनी हा फोटो स्टेटसला ठेवत माजी आमदार राम सातपुते यांचे नाव न घेता त्यांना डिवचले.
