HELLO SOLAPUR | मोहोळ तालुक्यातील अनगर नगरपंचायत निवडणूक अखेर बिनविरोध जाहीर करण्यास राज्य निवडणूक आयोगाने अधिकृत मान्यता दिली आहे. यासंदर्भात राज्य निवडणूक आयोगाचे उपायुक्त राजेंद्र पाटील यांनी सोलापूरच्या जिल्हाधिकाऱ्यांना पत्र पाठवले आहे.
या पत्रानुसार, अनगर नगरपंचायत निवडणुकीत सर्व 17 प्रभागांसाठी आणि नगराध्यक्ष पदासाठी प्रत्येकी केवळ एकच उमेदवारी अर्ज वैध राहिल्याने ही निवडणूक बिनविरोध जाहीर करण्यास आयोगाची संमती देण्यात आली आहे.
यानुसार उद्या सकाळी निवडणूक निर्णय अधिकारी तथा तहसीलदार सचिन मुळीक हे अनगर नगरपंचायत निवडणूक बिनविरोध झाल्याची अधिकृत घोषणा करणार आहेत. तसेच या वेळी सर्व विजयी उमेदवारांना निवडणूक निर्णय अधिकाऱ्यांच्या हस्ते विजयाचे प्रमाणपत्र देण्यात येणार आहे.
विशेष म्हणजे, अनगर नगरपंचायतीतील सर्व 17 प्रभागांवर आणि नगराध्यक्ष पदावर भाजपचे उमेदवार बिनविरोध विजयी झाले आहेत. नगराध्यक्ष पदासाठी भाजपकडून प्राजक्ता पाटील या उमेदवार होत्या.
स्थानिक स्वराज्य संस्थांच्या निवडणुकांच्या पार्श्वभूमीवर अनगर नगरपंचायतीतील ही बिनविरोध निवडणूक भाजपसाठी मोठे यश मानले जात असून, मोहोळ तालुक्यात भाजपची संघटनात्मक ताकद पुन्हा एकदा अधोरेखित झाली आहे.
