HELLO SOLAPUR | सोलापूर जिल्ह्यात बांधकाम कामगार कल्याण मंडळातील शिष्यवृत्ती योजनेत मोठा आर्थिक घोटाळा उघडकीस आला आहे. बोगस प्रमाणपत्रांच्या साह्याने मंडळातील काही अधिकाऱ्यांनीच तब्बल 3 कोटी 63 लाख रुपये लाटल्याचे समोर आले आहे.
या प्रकरणी संबंधित 3 अधिकाऱ्यांसह एकूण 20 जणांविरोधात पोलिसांत गुन्हा दाखल करण्यात आला आहे. मिळालेल्या माहितीनुसार, जिल्ह्यातील बांधकाम कामगारांच्या मुलांनी परराज्यात उच्च शिक्षण घेत असल्याचे खोटे दाखले सादर करून शिष्यवृत्तीच्या नावाखाली ही रक्कम काढण्यात आली.
या प्रकरणी तालुका निरीक्षक अजिंक्य पवार, संतोषसिंग राजपूत आणि उज्वल सूर्यवंशी यांच्यावर गुन्हा दाखल करण्यात आला असून त्यांच्यावर निलंबनाची कारवाईही करण्यात आली आहे.
सहाय्यक कामगार आयुक्त मंगेश झोले यांनी दिलेल्या माहितीनुसार, या घोटाळ्यात बनावट कागदपत्रांच्या आधारे शिष्यवृत्तीची रक्कम काढण्यात आली. बांधकाम कामगार कल्याणकारी मंडळाकडून कामगारांच्या मुलांच्या शिक्षणासाठी विशेष शिष्यवृत्ती योजना राबवली जाते.
या योजनेअंतर्गत कामगारांच्या पाल्यांना उच्च शिक्षणासाठी दरवर्षी प्रत्येकी सुमारे 60 हजार रुपये शासनाकडून दिले जातात.
सोलापूर जिल्ह्यात सुमारे एक लाखांहून अधिक बांधकाम कामगारांची नोंद आहे. या योजनेचा लाभ घेण्यासाठी सहा महिन्यांपूर्वी 223 लाभार्थ्यांनी आपल्या पाल्यांच्या नावावर शिष्यवृत्तीची रक्कम काढल्याची तक्रार विभागाकडे केली होती.
मात्र, त्या वेळी संबंधित अधिकाऱ्यांकडून या तक्रारीची दखल घेतली गेली नाही. तसेच तत्कालीन कामगार आयुक्तांनीही या प्रकरणाकडे दुर्लक्ष केल्याचे समोर आले आहे.
दरम्यान, या प्रकरणाची गंभीर दखल घेत भाजप आमदार विजयकुमार देशमुख यांनी याबाबत विधिमंडळाच्या अधिवेशनात तारांकित प्रश्न दाखल केला होता. मात्र हा प्रश्न सभागृहात मांडण्यापूर्वीच सहाय्यक कामगार आयुक्तांनी संबंधित तीन अधिकाऱ्यांना निलंबित करण्याची कारवाई केली.
या घोटाळ्यामुळे बांधकाम कामगारांच्या मुलांच्या शिक्षणासाठी असलेल्या योजनांचा गैरवापर झाल्याचे स्पष्ट झाले असून, पुढील तपासात आणखी धक्कादायक माहिती समोर येण्याची शक्यता व्यक्त केली जात आहे.
