HELLO SOLAPUR | सोलापूर जिल्हा परिषदेतील विषय समित्यांच्या निवडीत शिवसेना शिंदे गटाचे माजी मंत्री सिद्धाराम म्हेत्रे यांचे दबावतंत्र निष्फळ ठरल्याचे चित्र समोर आले आहे. या निवड प्रक्रियेमध्ये अपेक्षित राजकीय ताकद दाखवण्यात म्हेत्रे गट अपयशी ठरला असून, स्वपक्षातील सदस्यांकडूनही अपेक्षित साथ न मिळाल्याने त्यांची राजकीय कोंडी झाल्याचे दिसून आले. तर अक्कलकोटचे भाजप आमदार सचिन कल्याणशेट्टी मात्र किंग मेकरच्या भूमिकेत पाहायला मिळाले.
अक्कलकोटचे माजी आमदार सिद्धाराम म्हेत्रे यांना स्वतःच्या गटातील सदस्यांनीच साथ न दिल्यामुळे ते एकाकी पडल्याची चर्चा राजकीय वर्तुळात रंगली आहे. विशेषतः त्यांच्या मुलाला जिल्हा परिषदेतील महत्त्वाच्या विषय समित्यांमध्ये स्थान मिळावे यासाठी त्यांनी प्रयत्न केले होते. मात्र शिवसेना शिंदे गटातील सदस्यांनीच पाठिंबा न दिल्याने त्यांना अपेक्षित यश मिळू शकले नाही.
म्हेत्रे यांनी स्थायी समिती, बांधकाम समिती आणि समाजकल्याण समितीत स्थान मिळवण्यासाठी निवडणूक घेण्याची भूमिका जाहीर केली होती. मात्र प्रत्यक्ष आकडेवारी पाहता झेडपीतील 68 पैकी तब्बल 60 सदस्यांनी भाजपला पाठिंबा दर्शवला. त्यामुळे शिवसेना शिंदे गटाचा प्रभाव कमी पडल्याचे स्पष्ट झाले.
याशिवाय, स्वपक्षातील 8 सदस्यांपैकी 6 सदस्यांनी तटस्थ भूमिका घेतल्याने म्हेत्रे यांच्या अडचणीत अधिक भर पडली. परिणामी, निवडणूक लढवण्याचा निर्णय मागे घेत माघार घ्यावी लागली.
राजकीय समीकरणांचा विचार करता, जर ही निवडणूक झाली असती तर भाजपचे सर्व उमेदवार विजयी झाले असते आणि शिवसेना शिंदे गटाची मोठी नामुष्की झाली असती, अशीही चर्चा सुरू आहे.
एकूणच, या घडामोडींमुळे सोलापूर जिल्हा परिषदेतील सत्तासंतुलन स्पष्ट झाले असून, भाजपची पकड मजबूत झाल्याचे पुन्हा अधोरेखित झाले आहे. तर दुसरीकडे, शिवसेना शिंदे गटातील अंतर्गत मतभेद उघड झाल्याचेही या निमित्ताने समोर आले आहे.
बुधवारी विषय समित्यांच्या निवडी पार पडल्या. निवड प्रक्रियेपूर्वी अनेक नाट्यमय घडामोडी घडल्या. जिल्हा परिषदेत भाजपचे स्पष्ट बहुमत असल्याने मित्रपक्ष म्हणून शिवसेना (शिंदे गट) सदस्यांना समित्यांमध्ये स्थान देण्याचा निर्णय घेण्यात आला होता. मात्र अक्कलकोट तालुक्यातील शिवराज म्हेत्रे आणि प्रविण तानवडे यांनी स्थायी, बांधकाम आणि समाजकल्याण या महत्त्वाच्या समित्यांवर आग्रह धरला.
जी देईल ती समिती स्वीकारा अशी भूमिका भाजपकडून स्पष्ट करण्यात आली होती. तरीही या दोन्ही सदस्यांनी भाजपच्या भूमिकेला विरोध करत अर्ज भरण्याची तयारी दर्शविल्याने राजकीय वातावरण तापले होते.
