HELLO SOLAPUR | सोलापूर महानगरपालिका निवडणुकीच्या पार्श्वभूमीवर भारतीय जनता पक्षाने मोठा आणि महत्त्वाचा निर्णय घेतला आहे. भाजपकडून महापालिका निवडणुकीसाठी निवडणूक प्रमुखांची घोषणा करण्यात आली असून, अक्कलकोटचे भाजप आमदार सचिन कल्याणशेट्टी यांची सोलापूर महापालिका निवडणूक प्रमुखपदी नियुक्ती करण्यात आली आहे.
ही नियुक्ती भाजपचे प्रदेशाध्यक्ष रवींद्र चव्हाण यांनी अधिकृतपणे जाहीर केली आहे. आगामी निवडणुकीत सोलापूर महानगरपालिकेत सत्ता मिळवण्यासाठी भाजपने आतापासूनच तयारीला वेग दिला असल्याचे या नियुक्तीतून स्पष्ट होते.
आमदार सचिन कल्याणशेट्टी यांच्याकडे संघटन बांधणीचा चांगला अनुभव असून, जिल्ह्यातील पक्ष संघटन मजबूत करण्यासाठी त्यांनी यापूर्वीही प्रभावी भूमिका बजावली आहे. महापालिका निवडणुकीच्या दृष्टीने प्रभागनिहाय आढावा, इच्छुक उमेदवारांची चाचपणी, कार्यकर्त्यांचे संघटन, प्रचाराची आखणी आणि निवडणूक रणनीती आखण्याची महत्त्वाची जबाबदारी त्यांच्यावर असणार आहे.
या नियुक्तीमुळे भाजप कार्यकर्त्यांमध्ये उत्साहाचे वातावरण असून, येणाऱ्या निवडणुकीत सोलापूर महानगरपालिकेत भाजप सत्ता स्थापनेसाठी आक्रमक रणनीती राबवण्याची शक्यता व्यक्त केली जात आहे.
विशेष म्हणजे, सोलापूर महापालिका निवडणूक भाजप स्वबळावर लढवण्याच्या तयारीत असल्याचे स्पष्ट संकेत पक्षाकडून देण्यात आले आहेत. त्यामुळे आगामी काळात सोलापूरच्या राजकारणात हालचालींना वेग येणार असून, इतर पक्षांच्या रणनीतीकडेही सर्वांचे लक्ष लागले आहे.
