HELLO SOLAPUR | सोलापूर जिल्ह्याच्या औद्योगिक विकासाला चालना देणारा एक महत्त्वपूर्ण निर्णय मुख्यमंत्री देवेंद्र फडणवीस यांनी घेतला आहे. सोलापूर शहरातील अक्कलकोट रोड एमआयडीसी तसेच औद्योगिक वसाहत एमआयडीसी परिसरातील रस्त्यांच्या कामांसाठी ‘क्रिटिकल इन्फ्रा स्कीम’ अंतर्गत तब्बल 65 कोटी रुपयांचा निधी मंजूर करण्यात आला आहे.
या योजनेनुसार एकूण 65 कोटी रुपयांच्या कामांपैकी 14 कोटी रुपये हे संबंधित उद्योजकांकडून उभारले जाणे अपेक्षित होते. मात्र, विशेष बाब म्हणून मुख्यमंत्री देवेंद्र फडणवीस यांनी सोलापूर एमआयडीसीतील उद्योजकांच्या वाट्याचा हा खर्च पूर्णपणे माफ केला आहे. त्यामुळे उद्योजकांना 14 कोटी रुपयांची थेट आर्थिक सूट मिळाली असून, उद्योग क्षेत्रात समाधानाचे वातावरण निर्माण झाले आहे.
विशेष म्हणजे, राज्यात अशा प्रकारचा निर्णय प्रथमच घेण्यात आला असून, तो केवळ सोलापूर एमआयडीसीसाठी लागू करण्यात आला आहे. त्यामुळे हा निर्णय सोलापूरसाठी अत्यंत महत्त्वाचा आणि दिलासादायक मानला जात आहे.
या निधीच्या माध्यमातून अक्कलकोट रोड एमआयडीसी परिसरातील तब्बल 35 रस्ते, तसेच औद्योगिक वसाहतीतील 9 रस्त्यांचे काम एकाचवेळी हाती घेतले जाणार आहे. या कामांमुळे औद्योगिक क्षेत्रातील पायाभूत सुविधा मजबूत होणार असून, वाहतूक आणि उत्पादन प्रक्रियेला मोठी गती मिळणार आहे.
राज्यात महापालिका हद्दीत एमआयडीसी असलेली केवळ सोलापूर आणि सांगली ही दोनच शहरं आहेत. त्यामुळे सोलापूरसाठी घेतलेला हा निर्णय अधिक महत्त्वाचा ठरत आहे.
या संदर्भात आमदार देवेंद्र कोठे यांनी पत्रकार परिषदेत माहिती देताना सांगितले की, या निर्णयामुळे सोलापूर एमआयडीसीतील अनेक प्रलंबित प्रश्न मार्गी लागणार आहेत.
दरम्यान, अक्कलकोट रोड एमआयडीसी परिसरातील व्यापाऱ्यांनी मुख्यमंत्री देवेंद्र फडणवीस, पालकमंत्री आणि आमदार देवेंद्र कोठे यांचे आभार मानले आहेत. आमदार देवेंद्र कोठे यांच्या प्रयत्नांमुळे आमचा एक महत्त्वाचा प्रश्न मार्गी लागला असून, ते आमदार झाल्याने आमच्या उद्योजकांचे भाग्य उजळले, अशी प्रतिक्रिया उद्योजक पेंटप्पा गड्डम यांनी दिली.
एकंदरीत, 65 कोटी रुपयांचा निधी आणि 14 कोटी रुपयांची सूट यामुळे सोलापूरच्या औद्योगिक विकासाला मोठी चालना मिळणार असून, भविष्यातील गुंतवणुकीसाठीही हा निर्णय महत्त्वाचा ठरणार आहे.
