HELLO SOLAPUR | सोलापूर महानगरपालिका निवडणुकीच्या पार्श्वभूमीवर भाजपकडून प्रचाराचा जोर वाढला असून, प्रभाग क्रमांक ११ मधील राजीव नगर येथे झालेल्या सभेत आमदार सचिन कल्याणशेट्टी आणि आमदार देवेंद्र कोठे यांच्या उपस्थितीत नागरिकांचा उत्स्फूर्त प्रतिसाद पाहायला मिळाला.
लिंगायत समाजाचे प्राबल्य असलेल्या या भागात झालेल्या सभेत कोठे–कल्याणशेट्टी जोडीच्या विकासाभिमुख भूमिकेने नागरिकांची मने जिंकली.
रस्ते, ड्रेनेज, पाणीपुरवठा यांसारख्या मूलभूत सुविधांसाठी प्रभाग क्रमांक ११ मध्ये १२ कोटी रुपयांची विकासकामे मंजूर करण्यात आली असून, त्यापैकी ९ कोटी रुपयांची कामे सध्या सुरू आहेत.
भविष्यातही प्रभागाच्या सर्वांगीण विकासासाठी भरघोस निधी उपलब्ध करून दिला जाईल, असे ठोस अभिवचन आमदार सचिन कल्याणशेट्टी आणि आमदार देवेंद्र कोठे यांनी यावेळी दिले.
यावेळी या कॉर्नर सभेला व्यासपीठावर आमदार सचिन कल्याणशेट्टी, आमदार देवेंद्र कोठे, गुरुशांत धुत्तरगावकर, उमेदवार युवराज सरवदे, शारदाबाई रामपुरे, मीनाक्षी कडगंची, अजय पोन्नम, राजकुमार हंचाटे, प्रकाश म्हंता, गणेश चवरे यांची प्रमुख उपस्थिती होती.
कन्नड भाषेत संवाद साधत जिंकली मनं :
आमदार सचिन कल्याणशेट्टी यांनी यावेळी कन्नड भाषेतून नागरिकांशी थेट संवाद साधला. आमदार देवेंद्र कोठे यांच्या नेतृत्वाखाली प्रभाग क्रमांक ११ सह शहर मध्य मतदारसंघात मोठ्या प्रमाणावर विकासकामे झाली असल्याचे त्यांनी सांगितले.
सोलापूर शहरात विमानसेवा, आयटी पार्क, समांतर जलवाहिनी, समतोल पाणीपुरवठ्यासाठी ८९२ कोटी रुपयांची योजना अशी अनेक महत्त्वाची विकासकामे मार्गी लागल्याचेही त्यांनी स्पष्ट केले.
भविष्यातही विकासाची गती कायम राहणार असून, प्रभाग क्रमांक ११ सह सोलापूर शहरातील भाजपच्या सर्व उमेदवारांना निवडून देण्याचे आवाहन आमदार सचिन कल्याणशेट्टी यांनी नागरिकांना केले.
१४७ कोटींचा निधी, कामे प्रगतीपथावर – आमदार देवेंद्र कोठे :
आमदार देवेंद्र कोठे यांनी आपल्या भाषणात मुख्यमंत्री देवेंद्र फडणवीस यांच्या नेतृत्वाखाली शहर मध्य विधानसभा मतदारसंघासाठी १४७ कोटी रुपयांचा निधी मंजूर झाल्याचे सांगितले. यातील कोट्यवधी रुपयांची कामे सध्या प्रगतीपथावर आहेत.
काँग्रेसच्या तत्कालीन आमदार प्रणिती शिंदे यांना त्यांच्या १५ वर्षांच्या कार्यकाळातही एवढा निधी मिळाला नव्हता, असा आरोप करत, “खासदार प्रणिती शिंदे यांनी प्रभाग क्रमांक ११ मध्ये किमान ९० लाख रुपयांचा निधी तरी दिला आहे का?” असा सवाल आमदार कोठे यांनी उपस्थित केला.
भाजपच्या चारही उमेदवारांना निवडून देण्याचे आवाहन “आपण संघटित राहिलो तर अंगणातील तुळस आणि देवळावरील कळस सुरक्षित राहील. एमआयएमसारख्या पक्षाला डोक्यावर बसवून घेणे परवडणारे नाही.”
पुढे प्रभाग क्रमांक ११ मधील भाजपच्या चारही उमेदवारांना प्रचंड मताधिक्याने निवडून देण्याचे आवाहन आमदार देवेंद्र कोठे यांनी केले.
मकर संक्रांतीपूर्वी लाडक्या बहिणींना मिळणार ३ हजार रुपये :
लाडकी बहीण योजना बंद होणार असल्याचा खोटा प्रचार काँग्रेस व विरोधकांकडून करण्यात येत असल्याचा आरोप आमदार देवेंद्र कोठे यांनी केला. ही योजना सुरू असून भविष्यातही सुरूच राहणार असल्याचे त्यांनी स्पष्ट केले.
यंदाच्या मकर संक्रांतीपूर्वी मुख्यमंत्री देवेंद्र फडणवीस यांच्या सरकारकडून लाडक्या बहिणींना ३ हजार रुपये मिळणार असल्याची घोषणा त्यांनी केली. तसेच सोलापूर महानगरपालिकेवर सत्ता आल्यानंतर लाडक्या बहिणींना मिळणारी रक्कम १,५०० रुपयांवरून २,१०० रुपये करण्याची मागणी करण्यात येणार असल्याचेही त्यांनी सांगितले.
