HELLO SOLAPUR | सोलापूर महानगरपालिकेचे माजी उपमहापौर राजेंद्र कलंत्री आणि एमआयएम पक्षाचे सोलापूर महानगरपालिकेतील गटनेते रियाज खरादी यांनी आज राष्ट्रवादी काँग्रेस पक्षात जाहीर प्रवेश केला. हा पक्षप्रवेश मुंबई येथे पार पडला.
राज्याचे उपमुख्यमंत्री अजित पवार यांच्या शुभहस्ते तसेच राज्याचे कृषिमंत्री व सोलापूर जिल्ह्याचे संपर्क मंत्री दत्तात्रय भरणे यांच्या प्रमुख उपस्थितीत हा पक्षप्रवेश सोहळा संपन्न झाला.
या पक्षप्रवेशासाठी राष्ट्रवादी काँग्रेस अल्पसंख्यांक विभागाचे प्रदेश कार्याध्यक्ष वसीम बुऱ्हाण यांनी विशेष पुढाकार घेतला.
राजेंद्र कलंत्री हे सोलापूर शहरातील परिचित व अनुभवी राजकीय व्यक्तिमत्त्व असून, उपमहापौर पदाच्या कार्यकाळात त्यांनी शहरातील विविध विकासकामांत सक्रिय भूमिका बजावली आहे.
तर रियाज खरादी हे एमआयएम पक्षाचे सोलापूर महानगरपालिकेतील गटनेते म्हणून कार्यरत होते. त्यांच्या सामाजिक आणि राजकीय कार्याची शहरात वेगळी ओळख आहे.
या दोन्ही नेत्यांच्या राष्ट्रवादी काँग्रेसमधील प्रवेशामुळे सोलापूर शहराच्या राजकारणात नव्या राजकीय समीकरणांची चर्चा सुरू झाली आहे.
विशेषतः अल्पसंख्यांक समाजासह सर्वसामान्य मतदारांमध्ये राष्ट्रवादी काँग्रेसची ताकद अधिक वाढेल, असा विश्वास पक्षाच्या कार्यकर्त्यांकडून व्यक्त केला जात आहे.
पक्षप्रवेशानंतर उपस्थित नेत्यांनी संघटना मजबूत करणे, सोलापूर शहराच्या सर्वांगीण विकासासाठी एकत्रितपणे काम करणे आणि येणाऱ्या काळात पक्षाची भूमिका अधिक प्रभावीपणे मांडणे, यावर भर दिला.
या कार्यक्रमाला मुंबईसह सोलापूर जिल्ह्यातील राष्ट्रवादी काँग्रेसचे अनेक पदाधिकारी, कार्यकर्ते आणि समर्थक मोठ्या संख्येने उपस्थित होते.
या प्रवेशामुळे सोलापूरच्या राजकीय वातावरणात मोठी हालचाल निर्माण झाली आहे.
