HELLO SOLAPUR : सोलापूर महानगरपालिकेतील दहा स्वीकृत सदस्यांच्या निवडीकडे सध्या शहराचे लक्ष लागले आहे. २० फेब्रुवारी रोजी होणाऱ्या सर्वसाधारण सभेत स्वीकृत सदस्यांसह १६ स्थायी समिती आणि १२ परिवहन समिती सदस्यांची निवड होणार आहे.
स्वीकृत सदस्यपदाच्या 10 पैकी 9 जागा भाजपच्या वाट्याला तर 1 जागा एमआयएमच्या वाट्याला येणार असल्याने भाजपमध्ये इच्छुकांची मोठी गर्दी झाली असून अंतर्गत चुरस वाढली आहे.
स्वीकृत सदस्यपदासाठी आज सकाळी ११ ते दुपारी १.३० या वेळेत महापालिका आयुक्त डॉ. सचिन ओंबासे यांच्या कार्यालयात उमेदवारी अर्ज दाखल करण्यात आले.
नगरसचिव प्रवीण दंतकाळे यांनी अर्ज स्वीकारले. या प्रक्रियेदरम्यान आयुक्त कार्यालय परिसरात इच्छुक आणि त्यांच्या समर्थकांची मोठी गर्दी पाहायला मिळाली.
भाजपकडून माजी नगरसेवक, शहर पदाधिकारी आणि पक्षातील वरिष्ठ कार्यकर्त्यांनी मोठ्या संख्येने उमेदवारी अर्ज दाखल केले आहेत.
यामध्ये प्रभाकर जामगुंडे, शहराध्यक्ष रोहिणी तडवळकर, जगदीश पाटील, शशी थोरात, अक्षय आंजिखाने, दायमा श्रीनिवास, सुधा अळीमोरे, श्रीकांत घाडगे, जवाहर जाजू, अनुप खंडेलवाल, केतन शहा, वृषाली चालुक्य, पांडुरंग दीडी, दीक्षित, ॲड. साधना संगवे, सूरज चव्हाण, झंवर कृष्णा, महेश तापडिया, दरक लक्ष्मीकांत, मल्लिनाथ राचेटी, सोमनाथ केंगनाळकर, रुद्रेश बोरामणी आदींचा समावेश आहे.
दरम्यान, एमआयएमकडून गाजी जहागिरदार, नईम सालार आणि फिरदौस पटेल यांनी स्वीकृत सदस्यपदासाठी उमेदवारी अर्ज दाखल केले आहेत. एमआयएमला एक जागा मिळण्याची शक्यता लक्षात घेता या तिघांमध्येही स्पर्धा निर्माण झाली आहे.
स्वीकृत सदस्यपदासाठी मोठ्या प्रमाणात इच्छुक रिंगणात उतरल्याने भाजपमध्ये अंतर्गत राजकीय हालचालींना वेग आला आहे. अंतिम निवडीत पक्षश्रेष्ठींचा निर्णय महत्त्वाचा ठरणार असून इच्छुकांनी आमदार, पालकमंत्री, प्रदेशाध्यक्ष ते मुख्यमंत्री स्तरापर्यंत पाठपुरावा सुरू केल्याचे चित्र दिसून येत आहे.
२० फेब्रुवारी रोजी होणाऱ्या सर्वसाधारण सभेत होणाऱ्या निवडीकडे सर्वांचे लक्ष लागले असून, स्वीकृत सदस्यांच्या माध्यमातून सोलापूर महापालिकेतील आगामी राजकारणाची दिशा स्पष्ट होणार असल्याचे राजकीय वर्तुळात बोलले जात आहे.
