HELLO SOLAPUR | महागड्या वैद्यकीय उपचारांमुळे हतबल झालेल्या सामान्य कुटुंबाला शासनाच्या मदतीने मोठा दिलासा मिळाला आहे. अहिल्यानगर येथील महेश चंद्रकांत फलके यांना मुख्यमंत्री सहाय्यता निधीमधून ३ लाख रुपयांहून अधिक मदत मिळाल्याने या तरुणाला जीवदान मिळाले आहे. या मदतीबद्दल फलके कुटुंबाने मुख्यमंत्री देवेंद्र फडणवीस यांचे आभार मानले.
अहिल्यानगर येथील ट्रक ड्रायव्हर चंद्रकांत फलके यांच्या मुलाला व्हस्क्युलर अँड इंडो व्हस्क्युलर सर्जरी सांगण्यात आली होती. मात्र याचा खर्च या कुटुंबाला करणे अशक्य होते. मात्र मुख्यमंत्री सहाय्यता निधीच्या माध्यमातून मुख्यमंत्री देवेंद्र फडणवीस यांच्या टीमने 3 लाखापेक्षा अधिक मदत केल्याने कुटुंबाचा भार हलका झाल्याची भावना त्यांनी व्यक्त केलीय.
नेमकी घटना काय?
ऋषिकेश चंद्रकांत फलके यांचे बंधू महेश फलके यांची प्रकृती खालावल्याने त्यांना पुणे येथील नामांकित रुबी हॉल क्लिनिक मध्ये दाखल करण्यात आले होते. त्यांना तात्काळ व्हस्क्युलर अँड इंडो व्हस्क्युलर सर्जरी करण्याचे सांगण्यात आले होते. मात्र खाजगी रुग्णालयातील उपचारांचा खर्च मोठा असल्याने फलके कुटुंब आर्थिक विवंचनेत होते.
या कठीण प्रसंगात फलके कुटुंबाने रुग्णसेवक आनंद गोसकी यांच्या माध्यमातून मदतीसाठी पाठपुरावा केला. त्यांना याकामी मुख्यमंत्र्यांचे ओएसडी रामेश्वरभाऊ नाईक आणि रुग्णसेवक आनंद गोसकी यांचे मोलाचे सहकार्य लाभले. त्यांच्या माध्यमातून मुख्यमंत्री कार्यालयाशी संपर्क साधून उपचारांसाठी मदतीची विनंती करण्यात आली होती.
३ लाखांचे अर्थसाहाय्य :
रुग्णाची परिस्थिती पाहून मुख्यमंत्री देवेंद्र फडणवीस यांनी मुख्यमंत्री सहाय्यता निधीतून तातडीने ३ लाख रुपयांपेक्षा जास्त निधी मंजूर केला. या निधीमुळे महेश फलके यांच्यावर योग्य उपचार होऊ शकले.
“आमच्या संकटाच्या काळात मुख्यमंत्री देवेंद्रजी फडणवीस साहेब आणि त्यांच्या टीमने आम्हाला जी मदत केली, ती आम्ही कधीही विसरणार नाही. त्यांच्यामुळेच माझ्या भावाचे प्राण वाचले आहेत. आम्ही संपूर्ण फलके परिवारातर्फे त्यांचे ऋणी आहोत.”
– ऋषिकेश फलके (रुग्णाचे भाऊ)
या मदतीमुळे फलके कुटुंबाला मोठा आधार मिळाला असून, परिसरात या सामाजिक कार्याचे कौतुक होत आहे. “रुग्णाच्या डोळ्यातील अश्रू पुसणे हीच खरी रुग्णसेवा आहे. मुख्यमंत्री देवेंद्र फडणवीस साहेब यांच्या मार्गदर्शनाखाली आम्ही गरजूंपर्यंत पोहोचण्याचा प्रयत्न करतोय. मुख्यमंत्री सहाय्यता निधीच्या माध्यमातून मुख्यमंत्री कार्यालयाच्या माध्यमातून हजारो कुटुंबांना आम्ही आजवर आधार देऊ शकलो आहोत, याचा आम्हाला सार्थ अभिमान आहे.”
– आनंद गोसकी, रुग्णसेवक
