HELLO SOLAPUR | सोलापूर विधान परिषदेची निवडणूक जाहीर झाली आहे. सोलापूरमध्ये भाजपकडून उमेदवार कोण याबाबत अनेक तर्कवितर्क लढवले जात आहेत. यामध्ये प्रामुख्याने माजी आमदार प्रशांत परिचारक, माजी आमदार राजेंद्र राऊत, माजी आमदार राजन पाटील, माढ्याचे रणजितसिंह शिंदे, माजी भाजप जिल्हाध्यक्ष शहाजी पवार तसेच विद्यमान जिल्हाध्यक्ष शशिकांत चव्हाण यांची नावे चर्चेत आहेत.
दरम्यान यामध्ये बार्शीचे माजी आमदार राजेंद्र राऊत यांचे नाव जोरदार चर्चेत आलेय. आज मुंबई ते सोलापूर असा विमानप्रवास पालकमंत्री जयकुमार गोरे आणि माजी आमदार राजेंद्र राऊत यांनी केल्याने अनेकांच्या भुवया उंचावल्या आहेत.
‘हॅलो सोलापूर’च्या सूत्रांच्या माहितीनुसार आज 22 मे 2026 रोजी पालकमंत्री जयकुमार गोरे आणि माजी आमदार राजेंद्र राऊत यांनी एकत्र विमान प्रवास केला. मुंबईहून ते सोलापूरला दाखल झाले. त्यामुळे राजेंद्र राऊत यांच्या उमेदवारीने चर्चेला जोर धरला आहे.
काल बार्शीमध्ये राजेंद्र राऊत समर्थकांनी फटाक्यांची अतिशबाजी करत जल्लोष केल्याची माहिती समोर आलीय. त्यामुळे राजेंद्र राऊतांच्या नावावर शिक्का मोर्तब झाल्याची बोलले जात आहे..
असं असलं तरी भाजपच्या आजवरचा इतिहास पाहता भाजपचे धक्कातंत्र वेगळे असते. याशिवाय आगामी लोकसभा विधानसभा निवडणुकीची रणनीती पाहता माढा लोकसभेत भाजप आपली ताकद वाढवण्याचा प्रयत्न करत आहे. त्यामुळे माढा लोकसभेच्या दृष्टीने माढा किंवा पंढरपूर हे विधानसभा मतदारसंघ भाजपच्या संघटनात्मक दृष्टीने कमकुवत आहेत. त्यामुळे भाजप तिकडे लक्ष केंद्रित करण्याची शक्यता दाट आहे.
मात्र आज अचानक पालकमंत्री जयकुमार गोरे आणि माजी आमदार राजेंद्र राऊत यांच्या विमानप्रवासामुळे अनेकांचे डोळे विस्फारले आहेत. अर्थात पंतप्रधान नरेंद्र मोदींच्या आवाहनानंतर अनेक मंत्र्यांनी आणि नेत्यांनी सार्वजनिक वाहतुकीने प्रवास करत आहेत. त्यामुळे दोन्ही नेत्यांचा प्रवास हा योगायोग होता की राजकीय चर्चेचा होता हे आगामी काळ ठरवेल.
