HELLO SOLAPUR | सोलापूर जिल्हा परिषदेत भाजपकडून महत्त्वाच्या पदांवर नियुक्त्या जाहीर करण्यात आल्या आहेत. जिल्हा परिषदेत भाजपच्या गटनेतेपदी करमाळा तालुक्यातील झेडपी सदस्य रश्मी बागल यांची निवड करण्यात आली आहे. तर उपनेतेपदी मंगळवेढा तालुक्यातील प्रदीप खांडेकर यांची निवड करण्यात आली आहे.
याशिवाय, भाजपचे जिल्हाध्यक्ष आणि नुकतेच निवडून आलेले झेडपी सदस्य चेतनसिंह केदार यांच्यावर प्रतोद पदाची जबाबदारी सोपवण्यात आली आहे. तर नेताजी खंडागळे यांची जिल्हा परिषदेत प्रवक्ते म्हणून नियुक्ती करण्यात आली आहे.
त्यामुळे जिल्हा परिषदेत भाजपची संघटनात्मक ताकद अधिक मजबूत करण्याचा प्रयत्न असल्याचे मानले जात आहे.
दरम्यान, सोलापूर जिल्हा परिषदेत एकूण ६८ पैकी ३८ जागा जिंकत भाजपने स्पष्ट बहुमत मिळवले आहे. त्यामुळे जिल्हा परिषदेत भाजपची एकहाती सत्ता आहे.
महत्त्वाची बाब म्हणजे, जिल्हा परिषद अध्यक्षपद यंदा ओबीसी प्रवर्गासाठी राखीव आहे. त्यामुळे या पदासाठी कोणाला संधी मिळणार याकडे जिल्ह्याचे राजकीय लक्ष लागले आहे.
यंदा भाजपने गटनेते, प्रतोद आणि प्रवक्ते या तीन पदांवर मराठा समाजाला संधी दिली तर उपनेतेपदी धनगर समाजाला संधी दिली आहे. त्यामुळे अध्यक्षपद कुणबी सोडून मूळ ओबीसी समाजातील नेत्याकडे जाण्याची शक्यता अधिक असल्याची चर्चा राजकीय वर्तुळात रंगली आहे.
दरम्यान, १८ मार्च रोजी जिल्हा परिषद अध्यक्षपदाची निवड प्रक्रिया पार पडणार असून, त्या दिवशी अध्यक्षपदासाठी नेमका कोणता चेहरा पुढे येतो हे स्पष्ट होणार आहे. त्यामुळे जिल्हा परिषदेत पुढील काही दिवस राजकीय हालचालींना वेग येण्याची शक्यता आहे.
