HELLO SOLAPUR | काही माध्यमांकडून राष्ट्रवादी काँग्रेस पक्षात मोठी फूट पडणार असल्याचा आणि २२ आमदार शरद पवार गटाच्या संपर्कात असल्याच्या धादांत खोट्या व दिशाभूल करणाऱ्या बातम्या काही माध्यमांनी ठळकपणे दिल्या आहेत. पण, प्रत्यक्षात एकाही आमदाराने शरद पवार साहेबांच्या पक्षाच्या संपर्कात नसून कोणत्याही आमदाराने राजकीय हेतूने भेट घेतलेली नाही, अशी माहिती पक्षाचे नेते उमेश पाटील यांनी पत्रकार परिषदेत दिली.
मागील आठवड्यात प्रदेशाध्यक्ष खासदार सुनील तटकरे साहेब यांनी शरद पवार साहेबांच्या तब्येतीची विचारपूस करण्यासाठी सदिच्छा भेट घेतली होती. या भेटीनंतर स्वतः मा. सुनिल तटकरे साहेबांनी माध्यमांना माहिती दिली होती असेही उमेश पाटील यांनी निदर्शनास आणून दिले.
आज काही वृत्तवाहिन्यांवर राष्ट्रवादी काँग्रेस पक्षाचे २२ आमदार राष्ट्रवादी काँग्रेस शरदचंद्र पवार पक्ष्यांमध्ये जाणार असल्याच्या बातम्या प्रसारित करण्यात आल्या. या संदर्भात पक्षाचे नेते उमेश पाटील, आमदार संजय बनसोडे, आमदार प्रताप पाटील चिखलीकर यांनी पत्रकार परिषद घेत पक्षाची अधिकृत भूमिका स्पष्ट केली.
ते पुढे म्हणाले की, “सत्तेत असलेले आमदार विरोधी पक्षात जाणार, अशा प्रकारच्या बातम्या कोणत्याही ठोस पुराव्याशिवाय चालवणे अत्यंत गैर आहे. २२ आमदार भेटले असल्याचा कोणताही पुरावा माध्यमांकडे आहे का? वारंवार अशा अफवा पसरवून आमच्या पक्षातील आमदारांमध्ये गैरसमज होवू नये यासाठी अधिकृतपणे माहिती देण्यासाठी ही अधिकृत पत्रकार परिषद असल्याचे उमेश पाटील यांनी स्पष्ट केले.
“राष्ट्रवादी काँग्रेस पक्षात प्रत्येकाला आपले मत व्यक्त करण्याचे आणि कुणालाही भेटण्याचे स्वातंत्र्य आहे. आमच्या पक्षातील आमदार कुणाला भेटायचे किंवा कुठे जायचे यावर कोणतीही बंधने नाहीत. मात्र काही माध्यमांकडून जाणीवपूर्वक फेक नॅरेटिव्ह पसरवण्याचे काम सुरू आहे,” असा आरोपही त्यांनी केला.
यावेळी पक्षात सुरू असलेल्या प्रवेशाबाबत बोलताना त्यांनी सांगितले की, “आज प्रबोध डावखरे यांनी राष्ट्रवादी काँग्रेस पक्षात प्रवेश केला. अशा अनेक कार्यकर्ते, पदाधिकारी आणि विविध पक्षातील नेते राष्ट्रवादी काँग्रेस पक्षात प्रवेश करण्यासाठी उत्सुक आहेत.
शेवटी त्यांनी माध्यमांना आवाहन करताना सांगितले की, “अफवा आणि अप्रमाणित बातम्या दाखवून जनतेमध्ये संभ्रम निर्माण करू नये. जबाबदारीने आणि सत्य पडताळूनच बातम्या प्रसारित कराव्यात.”
